ქართველი მოკრივის ავთანდილ ხურციძის დედა მაყვალა ხუციშვილი აცხადებს, რომ მისი შვილი უდანაშაულოა.
მისი თქმით, ნიუ იორკის სასამართლოს ნაფიცი მსაჯულების გადაწყვეტილება, რომლებმაც მისი შვილი ყველა წარდგენილ ბრალდებაში დამნაშავედ ცნეს, ახლახანს შეატყობინეს.
„მივმართავ საქართველოს ხელისუფლებას, რათა დამტკიცდეს სპორტსმენის უდანაშაულობა. არასოდეს დაგვხმარებია ხელისუფლება, როდესაც უკიდურესად გვიჭირდა. ჩემი შვილი ქართული დროშის ქვეშ იბრძოდა. იგი სხვამ გახვია სკანდალში. ამერიკიდან ავთოს მეგობარი მერაბ დვალიშვილი დაგვიკავშირდა და გვითხრა სასამართლოს შესახებ. ღამით ჩემმა შვილმა დამირეკა და მითხრა, რომ მალე დაამტკიცებს თავის უდანაშაულობას”, – განაცხადა მაყვალა ხურციძემ.
ნიუ-იორკის საოლქო სასამართლოს ნაფიცმა მსაჯულებმა ქართველი მოკრივე ავთანდილ ხურციძე ყველა წარდგენილ ბრალდებაში დამნაშავედ ცნეს. შესაბამის ინფორმაციას ამერიკის შეერთებული შტატების იუსტიციის დეპარტამენტი ავრცელებს.
სასჯელის ზომა ამ ეტაპზე უცნობია. მოსამართლე გადაწყვეტილებას 21 სექტემბერს გამოაცხადებს.
საქმეზე კიდევ ერთი ეჭვმიტანილი ე.წ. კანონიერი ქურდი რაჟდენ შულაია იყო, რომელსაც გამოძიება კრიმინალური დაჯგუფების ლიდერად მოიხსენიებდა.
არსებითი განხილვა საქმეზე 5 ივნისს დაიწყო. გამოძიების მტკიცებით, დაჯგუფება, რომელსაც რაჟდენ შულაია ხელმძღვანელობდა და რომლის შემადგენლობაშიც ხურციძეც შედიოდა, არალეგალური ვაჭრობითა და განსაკუთრებით დიდი ოდენობით თაღლითობით იყო დაკავებული. სულ საქმეზე 30-მდე ადამიანია დაკავებული.
39 წლის ხურციძე, რომელსაც კრივში 33 მოგება, ორი ფრე და ორი მარცხი აქვს, ნიუ-იორკში გასული წლის ივლისში, ე.წ. რუსული მაფიის საქმეზე დააკავეს. წინასწარი ინფორმაციით, ხურციძეს 40 წლამდე თავისუფლების აღკვეთა ელის.