თბილისის მერის კახა კალაძის განცხადებით, ტაქსის მძღოლების დიდი ნაწილი ამ მიმართულებით დაგეგმილი რეფორმით კმაყოფილია. ასე გამოეხმაურა კახა კალაძე შემდეგი კვირიდან ტაქსის მძღოლების მიერ დაანონსებულ გაფიცვას. ამის შესახებ კალაძემ კომენტარი ავლაბარში, მელიქიშვილის ქუჩაზე მიმდინარე რეაბილიტაციის სამუშაოების დათვალიერების შემდეგ გააკეთა.
კახა კალაძის განმარტებით, ტაქსის მძღოლები არ არიან ვალდებულები გადაღებონ თავიანთი ავტომობილები და დასძინა, რომ ეს ვალდებულება მხოლოდ A კატეგორიის ტაქსებს ექნებათ.
“არის ორი კატეგორიის ლიცენზია – A და B , მათ შეუძლიათ აირჩიონ. თუ აქვთ სურვილი, აიღონ A კატეგორიის ლიცენზია, მოუწევთ გადაღებვა და ამაში ერთ თეთრსაც არ დახარჯავენ, ასევე, ექნებათ შესაბამისი მანიშნებელი და წარწერა “თბილისი”. მათთვის ქალაქში, კონკრეტულ ადგილებში პარკირება უფასო იქნება. A ლიცენზიის ტაქსის მძღოლები შეძლებენ საკუთარ ავტომობილზე რეკლამა განათავსონ და აქედან მიღებული შემოსავალი მათი საკუთრება იქნება. არის მეორე – B კატეგორია, რომელსაც შეუძლია არც მანქანა გადაღებოს, არც ტაქსის მანიშნებელი დააყენოს“, – განაცხადა კახა კალაძემ.