ბათუმში, „მუყაოს ქალაქის“ ტერიტორიაზე, 1000-ზე მეტი ბავშვისთვის და მათი ოჯახებისთვის სახლები აშენდება

ბათუმში, „მუყაოს ქალაქის“ ტერიტორიაზე, 1000-ზე მეტი ბავშვისთვის და მათი ოჯახებისთვის, რომლებიც უკიდურესად მძიმე პირობებში იმყოფებიან, საცხოვრებელი სახლები აშენდება. აღსანიშნავია, რომ იქ მცხოვრები ადამიანების უმრავლესობას სოციალურად დაუცველები წარმოადგენენ, ასევე, ეკომიგრანტები და მრავალშვილიანი ოჯახები.
უკვე მომზადდა პროექტი, ასევე, დღეს ცხადდება ტენდერი და მშენებლობა დაუყოვნებლივ დაიწყება. პირველ ეტაპზე ბინა 580 ოჯახისთვის აშენდება.
სამთავრობო კომისიამ თითოეული ოჯახის მდგომარეობა დეტალურად შეისწავლა. აღნიშნული ბაზა დამუშავდება და ამ პროცესში საერთაშორისო ორგანიზაციებთან ერთად, არასამთავრობო ორგანიზაციებიც ჩაერთვებიან.
ე.წ „მუყაოს ქალაქი“ წლების განმავლობაში მოუგვარებელ პრობლემად რჩებოდა და მოსახლეობა, ხშირად, ელემენტარული საცხოვრებელი პირობებით სარგებლობასაც კი ვერ ახერხებდა.