ქუთაისში, კიკვიძის სკვერში შეკრებილ ოპოზიციის ლიდერებსა და მათ მხარდამჭერებს ახლომდებარე ერთ-ერთი შენობის სახურავიდან კვერცხები დაუშინეს.
ამ წუთებში ოპოზიციის ლიდერები და მათი მხარდამჭერები ქუთაისში, კიკვიძის სკვერში არიან შეკრებილები, საიდანაც აღმაშენებლის მოედნისკენ მსვლელობას გამართავენ.
აქციის ორგანიზატორები აცხადებენ, რომ არ შეწყვეტენ საპროტესტო აქციებს, ვიდრე ხელისუფლება გაცემულ დაპირებას არ შეასრულებს და 2020 წლისთვის პროპორციულ საარჩევნო სისტემას არ დაამტკიცებს.
14 ნოემბრის შემდეგ თბილისსა და სხვა ქალაქებში საპროტესტო აქციები და საჯარო უწყებების „დაბოქლომება“ დაიწყეს ოპოზიციამ და საზოგადოებრივი მოძრაობის წევრებმა. თუმცა, ბოლო დღეების განმავლობაში, რეგიონებში აქციები ოპოზიციის, კერძოდ კი „ნაციონალური მოძრაობის“ წინააღმდეგაც იმართება. კონტრაქციის მონაწილეები „ნაცმოძრაობას“ აპროტესტებენ და სკანდირებენ „არა მიშას“.