საპარლამენტო უმრავლესობის წევრის მამუკა მდინარაძის განცხადებით, პარლამენტის შენობასთან მიმდინარე აქცია აზრს მოკლებულია, რადგან ირაკლი შოთაძის კანდიდატურის კენჭისყრის დრო ჯერ გადაწყვეტილი არ არის.
“ირაკლის შოთაძის კანდიდატურის კენჭისყრა, გადაწყვეტილიც კი არ არის დღეს იქნება თუ ხვალ, რას აპროტესტებენ? მთავარი საკითხი დღეს იქნება არჩილ თალაკვაძის ანგარიში და ჯობია, რომ მოუსმინონ პარლამენტის სხდომას და გაიგონ სინამდვილეში როგორ მუშაობს ის. ერთ მომიტინგეზე მოდის ერთი ჟურნალისტი, ორი ოპერატორი და ათი პოლიციელი, უხერხულია უკვე”,- განაცხადა მამუკა მდინარაძემ ჟურნალისტებთან.
ცნობისთვის, სამოქალაქო აქტივისტები და ოპოზიციური პარტიების წარმომადგენელები პარლამენტთან საპროტესტო აქციას მართავენ. ადგილზე, ასევე იმყოფებიან ოპოზიციონერი ლიდერები და მათი მხარდამჭერები. ისინი გენერალურ პროკურორად ირაკლი შოთაძის შესაძლო დაბრუნებას აპროტესტებენ.