თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ამ ეტაპზე მათ კლინიკაში კორონავირუსით ინფიცირებული 35 პაციენტი მკურნალობს, მათგან ორი მოზარდია.
მისივე თქმით, კლინიკაში მყოფი სამი პაციენტის ჯანმრთელობის მდგომარეობა კვლავ მძიმეა.
„ჩვენთან ამ ეტაპზე სულ 35 დადასტურებული პაციენტია, კვლავ გვრჩება მძიმე სამი პაციენტი, სამივესთან რადიოლოგიურად მძიმედ გამოხატული განვითარებული პნევმონიაა, კლინიკურად მათი მდგომარეობა გაუმჯობესებულია, ლაბორატორიული მონაცემებიც მიყვება, მაგრამ რადიოლოგიური მონაცემებით ჯერ არ გვაქვს გაუმჯობესება, განსაკუთრებით ერთ პაციენტთან რომელიც იყო კრიტიკული და მაღალი ასაკის პაციენტი. აქედან გამომდინარე, ჩვენ ჯერჯერობით პროგნოზზე ვერ ვილაპარაკებთ. ვნახოთ რადიოლოგიური მონაცემები როგორი იქნება და საბოლოოდ შემდგომში ვიტყვით ამ პაციენტების მდგომარეობის შესახებ.
რაც შეეხება დანარჩენ პაციენტებს, ძირითადად, გვყავს საშუალო სიმძიმის პაციენტები, დააახლოებით, 70 პროცენტში არის პნევმონია, დანარჩენებში პნევმონია არ გვაქვს, ამიტომ უკვე შეიძლება, განვიხილოთ ესენი, როგორც მსუბუქი პაციენტები. ველოდებით მათთან მონიტორინგის მონაცემებს – ვირუსის ელიმინაციას, ანუ როდის მოხდება ვირუსის გაქრობა. ჩვენთან ამ ეტაპზე ორი მოზარდია. ახალი პაციენტის მდგომარეობა სუბიექტური მონაცემებით, მიუხედავად იმისა, რომ ასაკოვანია, ჩივილები მას რაიმე განსაკუთრებული არ აქვს, ტემპერატურაც ნორმა აქვს, ლაბორატორიული მონაცემებითაც მნიშვნელოვანი ცვლილებები ამ ეტაპზე არ ვლინდება“, – განაცხადა მარინა ეზუგბაიამ.