თბილისში, ნაძალადევის რაიონში საცხოვრებელი სახლების დემონტაჟის დაწყებას ხმაური მოჰყვა. საუბარია 7 შენობაზე, რომლის დემონტაჟსაც მოსახლეობა შეეწინააღმდეგა.
ისინი ამბობენ, რომ სხვა საცხოვრებელი არ აქვთ, შენობების აღება კი მერიამ იმ მოტივით გადაწყვიტა, რომ სახლები რეკრეაციულ ზონაში თვითნებურად არის ჩადგმული.
მოსახლეობასა და მერიის წევრებს შორის სიტყვიერი დაპირისპირების შემდეგ, ადგილზე პოლიცია მივიდა.
აღნიშნულს თბილისის მერი, კახა კალაძე გამოეხმაურა.
მისი თქმით, ტერიტორია სახელმწიფოს ქონებაა და მიწების უკანონოდ მითვისება კანონით შეზღუდულია.
“ეს ტერიტორია არც ჩემი საკუთრებაა და არც სხვა ვინმესი, ეს გახლავთ სახელმწიფოს ქონება და შესაბამისად, უკანონოდ მიწების მიტაცება და იქ შენობა-ნაგებობების განთავსება კანონით შეზღუდულია. ამიტომ, ჩვენი სამსახურები კანონის ფარგლებში იმოქმედებენ, ამ ადამიანებს მიეცემათ გონივრული ვადა, რომ დაშალონ თავიანთი აშენებული შენობები იმიტომ, რომ ეს არის უკანონო”, – განმარტა კახა კალაძემ.