გვესმის, რომ ტურიზმში დასაქმებული ადამიანებისთვის მძიმე პერიოდია. ვერც იმას ვიტყვით, რომ ერთ დღეში ყველაფერი შეიცვლება და ყველაფერი კარგად იქნება, თუმცა იმედი გვაქვს, რომ ნელ-ნელა, ეტაპობრივად ამას ყველაფერს დავაბრუნებთ – ამის შესახებ პრემიერ-მინისტრმა ქუთაისში ტურიზმის სექტორის წარმომადგენლებთან შეხვედრაზე განაცხადა.
გიორგი გახარიას თქმით, ამისთვის დაახლოებით 1 წელი იქნება საჭირო. „აქ ყველას უნდა გვესმოდეს, რომ ერთმნიშვნელოვნად უნდა ვიმუშაოთ ყველამ ერთად. მთავრობა ცალკე, ბიზნესი ცალკე და ადგილობრივი მთავრობა ცალკე, არ გამოვა. ყველას უნდა გვესმოდეს, რომ პანდემია გლობალური გამოწვევაა და ჩვენც, ცალკე აღებული ქვეყანა ამას ვერ გავუმკლავდებით“, – აღნიშნა პრემიერ-მინისტრმა.
მისი თქმით, მთავრობა ორმხრივ ფორმატში მუშაობს კონკრეტულ ქვეყნებთან და როგორც ჩანს, პირველი ისრაელი იქნება.
„ისრაელისთვის 2 ძირითადი მიმართულებაა: ქუთაისი რა თქმა უნდა, პირველ რიგში და შემდგომ ბათუმი, ამიტომ მზად უნდა ვიყოთ. თუმცა მიუხედავად იმისა, რომ მეც და მთავრობაც სულ უფრო და უფრო მეტს ვსაუბრობთ ეკონომიკაზე, არ უნდა დაგვავიწყდეს ვირუსი“, – აღნიშნა პრემიერმა.