მიკროსაფინანსო ორგანიზაციაში შეჭრის საქმეზე სასამართლო პროცესი მიმდინარეობს, რომელსაც ბრალდებულის – ლევან ზურაბაშვილის დედაც ესწრებოდა.
ლამარა ტერელიძე ამბობს, რომ მის შვილს ძალით არავინ დაუკავებია და მძევლად არავინ აუყვანია. პირიქით, ლევან ზურაბაშვილის დედის განმარტებით, ის ორგანიზაციაში მყოფ პირებს ეუბნებოდა, დაეტოვებინათ ტერიტორია.
“საზოგადოებამ, ვინც კი უყურა, ყველა მეუბნება, კამერაში ჩაწერილია, იქ თურმე ლევანი რომ შევიდა უთქვამს, ვისაც გინდათ წადითო. ლევანს იქ არავინ დაუკავებია. ერთი მოხუცი კაცი იჯდა, უთხრეს წადიო და ალბათ რაღაცა სეირის ყურება უნდოდა და აღარ წავიდა. გოგოები მაგიდაზე ისხდნენ და იცინოდნენ, ხუმრობდნენო, ლევან, ყავა ხო არ მოგიტანოო.
რის გამო გააკეთა ასეთი რაღაცა? იცით, აქამდე არ მინდოდა მეთქვა, მაგრამ სიდუხჭირემ და გაჭირვებამ გააკეთებინა. მე არ ვიცი, თქვენ შეიძლება ძალიან კარგად ცხოვრობთ, მაგრამ ჩემს რაიონში, სამგორის რაიონში გაღარიბებული ხალხია. მე მასწავლებელი ვარ და ზოგჯერ ჩანთისკენ ხელი რომ გამიწევია, უფიქრიათ, რომ რაღაცა ტკბილეულს მომაწოდებსო,” – განაცხადა თამარა ტერელიძემ.
საქალაქო სასამართლო, ამ წუთებში, მიკროსაფინანსო ორგანიზაციაში შეჭრილი პირის აღკვეთ ღონისძიებაზე მსჯელობს. პროკურატურამ ზურაბიშვილს ბრალი გუშინ წარუდგინა. უწყება მას ორი ან მეტი პირის მძევლად ხელში ჩაგდებას ედავება. საქმეზე დაინიშნა ფსიქიატრიული ექსპერტიზა. ბალისტიკური კვლევის მიხედვით კი ლევან ზურაბაშვილი არ იყო შეიარაღებული ცეცხლსასროლი იარაღით, შესაბამისად მას ეს მუხლი მოეხსნა.