ამერიკაში მცხოვრები ბათუმელი ჟურნალისტის ტატო ცეცხლაძის ბრალდებებს, რომ სამსახურიდან სოციალურ ქსელში ბერა ივანიშვილზე დაწერილი სტატუსის გამო გაათავისუფლეს, რესტორანი „გრილ თაუნი” ეხმაურება და განცხადებას ავრცელებს.
„გრილ-თაუნის სახელით გვსურს ოფიციალურად განვაცხადოთ რომ ბატონი ტატო ცეცხლაძე მართლაც მუშაობდა გრილ-თაუნში, თუმცა არავითარ ინციდენტს მასთან დაკავშირებით ადგილი არ ჰქონია და მის მიერ გაკეთებული განცხადება სრულიად შეუსაბამოა სამსახურიდან წასვლის რეალურ მიზეზთან.
ჩვენი ინფორმაციით, ის აჭარის ტელევიზიიდან გეგმავდა აშშ-ში წასვლას რაც გახლდათ რეალური საფუძველი სამსახურიდან წასვლის. როგორც ვვარაუდობთ, მისთვის ხელსაყრელი იყო „დევნილის მანტიით” აღნიშნულ ქვეყანაში სტატუსის მიღება. შესაბამისად, ყოვლად უსაფუძვლოა განცხადება, რომელიც ლახავს ჩვენს იმიჯს და შეცდომაში შეჰყავს საზოგადოება,” – წერია რესტორნის მიერ სოციალურ ქსელში გავრცელებულ განცხადებაში.
შეგახსენებთ, გუშინ „ტვ პირველის” ეთერში გასული აუდიოჩანაწერის შემდეგ ბერა ივანიშვილი მის მიმართ განხორციელებულ მუქარაში დაადანაშაულა ამერიკაში მცხოვრებმა ბათუმელმა ჟურნალისტმა ტატო ცეცხლაძემ.