ჩრდილოეთ ინდოეთში, უტარ-პრადეშის შტატში, 17 წლის გოგო ოჯახის რამდენიმე წევრმა ცემით მოკლა. მიზეზი ჯინსის შარვლის ჩაცმაა, – ამის შესახებ BBC წერს.
მოკლულის დედა ამბობს, რომ თინეიჯერს ოჯახის არაერთმა წევრმა, ჯოხებით, უმოწყალოდ სცემა.
„მან დაიცვა ერთდღიანი მარხვა. საღამოს კი, ჯინსი და ტოპი ჩაიცვა და რელიგიური რიტუალი შეასრულა. ამ დროს, ბებიამ შენიშვნა მისცა ჩაცმულობასთან დაკავშირებით, ნეჰამ კი უპასუხა, რომ ჯინსი იმისთვის შეიქმნა, რომ ადამიანებმა ჩაიცვან“, – ამბობს მოკლულის დედა.
მისივე თქმით, კამათს ოჯახის სხვა წევრების აგრესია და ძალადობა მოჰყვა. როდესაც გოგომ გონება დაკარგა, მოძალადეებმა განაცხადეს, რომ მას საავადმყოფოში წაიყვანდნენ, გოგოს დედას კი, თან გაყოლის უფლება არ მისცეს.
შემთხვევიდან მეორე დღეს, თინეიჯერის ცხედარი დასახლებასთან ახლოს, ხიდზე ჩამოკიდებული იპოვეს. ირკვევა, რომ მათ გოგო საავადმყოფოში არც მიუყვანიათ.
პოლიციამ გამოძიება 10 ადამიანის წინააღმდეგ, მკვლელობისა და მტკიცებულებების განადგურების ბრალდებით დაიწყო. მათ შორის არიან გოგოს ბებია-ბაბუა, ბიძები, დეიდები, ბიძაშვილები და იმ ავტომობილის მძღოლი, რომლითაც გოგო წაიყვანეს.