ყველაფერს გავაკეთებ, რათა ეს სიყვარული, კეთილგანწყობა, რაც მოდის ადამიანებისგან, დავუბრუნო მათ კონკრეტული კარგად გაკეთებული საქმეებით, – ამის შესახებ „ქართული ოცნების“ გენერალურმა მდივანმა, დედაქალაქის მერობის კანდიდატმა კახა კალაძემ IRI-ის ახალი კვლევის შედეგებზე საუბრისას განაცხადა.
„აბსოლუტურად გულწრფელად გეტყვით, რომ არავის არ ვეჯიბრები. მე ვიცი მოსახლეობის განწყობები ჩემს მიმართ და ამის თქმის საშუალებას მაძლევს ის ყოველდღიური ურთიერთობა, რაც მაქვს თბილისის მოსახლეობასთან, ფაქტობრივად, ყველა რაიონში. უამრავი შეხვედრები, რომელიც არ გამიწყვეტია მთელი ამ წლების განმავლობაში. ზოგადად, პოლიტიკოსისთვის რეიტინგი, მის მიმართ დამოკიდებულებები, განწყობები ვიცით, თუ რამდენად მნიშვნელოვანია. შესაბამისად, მე ვარ ბედნიერი ადამიანი, რომ თბილისელების მხრიდან მაქვს ასეთი მხარდაჭერა და თანადგომა, რასაც მე ფაქტობრივად, ყოველდღიურად ვგრძნობ ქალაქში გადაადგილებისას. ყველაფერს გავაკეთებ, რათა ეს სიყვარული, კეთილგანწყობა, რაც მოდის ამ ადამიანებისგან, დავუბრუნო მათ კონკრეტული კარგად გაკეთებული საქმეებით, რითაც იამაყებს თითოეული ამ ქალაქში მცხოვრები ადამიანი“, – განაცხადა კახა კალაძემ.
ამასთან, კალაძემ IRI-ის ახალი კვლევის შედეგებით „ქართული ოცნების“ პარტიულ რეიტინგზეც ისაუბრა და აღნიშნა, რომ ნეგატიურადაა განწყობილი, რადგან ისინი არჩევნების შედეგებისგან რადიკალურად განსხვავდება-ხოლმე.
„სამწუხაროდ, უნდა აღინიშნოს, რომ ხშირია შემთხვევები, ამის ძალიან ცუდი გამოცდილება გვაქვს. მოყოლებული 2012 წლიდან, არაერთი კვლევა შემიძლია მოვიყვანო მაგალითად, ყველა არჩევნების წინ, როდესაც ხდებოდა მონაცემების გამოყენება და შემდეგ რა შედეგებით სრულდებოდა არჩევნები და ეს, რა თქმა უნდა, ამ კვლევების მიმართ ნეგატიურად განმაწყობს“, – დასძინა კახა კალაძემ.