მე რა ინფორმაციაც ამ დროისთვის მაქვს, დილიდან მაქსიმალურად ცდილობდნენ, რამენაირად პროვოკაციაზე წამოეგოთ კონკრეტული ადამიანები და, როგორც ჩანს, ეს გამოუვიდათ, თუმცა მომხდარს არანაირი გამართლება არ აქვს, – ასე უპასუხა „ქართული ოცნების“ აღმასრულებელმა მდივანმა, მამუკა მდინარაძემ კითხვას დმანისში მომხდარ ინციდენტთან დაკავშირებით.
„როდესაც სისხლის სამართლის დანაშაული ხდება, სავარაუდო დამნაშავეს არავინ დაიცავს – ყველამ გაითვალისწინოს ეს ამბავი. რაც არ უნდა პროვოკაცია ყოფილიყო, დანაშაულს გამართლება არ აქვს. შსს და პროკურატურა საკუთარ საქმეს გააკეთებენ. დარწმუნებული ვარ, რომ „ნაცმოძრაობის“ ლიდერებს ძალიან უხარიათ ეს ინციდენტი, იმიტომ რომ ამ დღეებში ასეთი მცდელობების კასკადი იყო. ძალიან უხარიათ ალბათ ეს ამბავი, მაგრამ აქ გასახარად არავის აქვს საქმე, იმიტომ რომ ადამიანები არიან დაშავებულები. ხელის დაფარებას დამნაშავისთვის არავინ აპირებს“, – აცხადებს მდინარაძე.