ჩხოროწყუში, საკრებულოს თავმჯდომარის მსგავსად, მოადგილეებად ოპოზიციის წარმომადგენლები აირჩიეს. პოსტები „ნაციონალურმა მოძრაობამ“ და გახარიას პარტიამ გადაინაწილეს.
საკრებულოს დღევანდელ სხდომას „ქართული ოცნების“ წარმომადგენლები არ დაესწრნენ.
„ნაციონალური მოძრაობის“ წევრებმა მხარი პარტია „საქართველოსთვის“ წარდგენილ კანდიდატს, დავით შენგელიას დაუჭირეს და ის თავმჯდომარის მოადგილედ აირჩიეს.
„პოლიტიკურ გარიგებაში არავისთან არ ვყოფილვართ, ჩვენ ჩვენი პარტიის კურსი და გზა გვაქვს, რომელსაც, ნებაყოფლობით, „ნაციონალური მოძრაობის“ წარმომადგენლები დაეთანხმნენ. ანალოგიური, ღია კომუნიკაცია გვაქვს „ქართულ ოცნებასთანაც“, – აცხადებს ჩხოროწყუს საკრებულოს თავმჯდომარე შოთა წურწუმია.
ორ პარტიას შორის მორიგებაზე ღიად საუბრობს საკრებულოს თავმჯდომარის პირველი მოადგილე.
„იყო მორიგება, რომ საკრებულო თავიდან ბოლომდე ოპოზიციური უნდა ყოფილიყო. „ნაციონალური მოძრაობა“ ყოველთვის თანხმობასა და მზაობას აცხადებდა, რომ ოპოზიციას ჩაებარებინა ყველა მნიშვნელოვანი თანამდებობა საკრებულოში“, – ამბობს ჩხოროწყუს საკრებულოს თავმჯდომარის პირველი მოადგილე რამაზ თოლორდავა.
„ქართული ოცნების“ წარმომადგენლების თქმით, დღეს კიდევ ერთხელ დადასტურდა, რომ „ნაციონალური მოძრაობა“ და პარტია „საქართველოსთვის“ ერთმანეთთან ალიანსშია.
„ისინი პირდაპირ კოალიციაში არიან ერთმანეთთან. ამის მაგალითია დღევანდელი დღეც. როდესაც თანამდებობები ნაწილდება, ამ სხდომებს არ ვესწრებით, რადგან „ნაციონალურ მოძრაობასთან“ „ქართული ოცნების“ თანამშრომლობა არცერთ ეტაპზე არ შეიძლება“, – აცხადებს ჩხოროწყუს საკრებულოს წევრი „ქართული ოცნებიდან“ ჯანო პერტაია.