ვერ ვისაუბრებ ყველა ჩემი კოლეგის სახელით, მაგრამ რუმინეთის მხრიდან ვიტყვი, ჩვენ ყოველთვის ვუჭერდით მხარს საქართველოს ევროატლანტიკურ პერსპექტივებს, ჩვენ მხარს ვუჭერთ საქართველოს გაწევრიანებას ევროკავშირშიც, – ამის შესახებ რუმინეთის საგარეო საქმეთა მინისტრმა, ბოგდან აურესკუმ „ქრონიკას“ განუცხადა.
„რუმინეთი მიიჩნევს, რომ საქართველო არის ჩრდილოატლანტიკური ალიანსის დე ფაქტო წევრი, რომელიც დიდ მხარდაჭერას უწევს ნატოს მისიებსა და ოპერაციებში. ალიანსის შიგნით სერიოზულად უნდა განვიხილოთ, რა სახის შემდგომი მხარდაჭერა შეგვიძლია აღმოვუჩინოთ საქართველოს, რათა გაზარდოს ქვეყანამ საკუთარი მედეგობა, რადგან მედეგობა მნიშვნელოვანია. მედეგობას მნიშვნელოვანი როლი უჭირავს ნატოს ახალ სტრატეგიულ კონცეფციაში, არა მხოლოდ ალიანსის წევრებისთვის , არამედ ეს ეხება ჩვენს პარტნიორებსაც“, – აღნიშნა რუმინეთის საგარეო საქმეთა მინისტრმა.
გერმანიაში ნატოს წევრი ქვეყნების საგარეო საქმეთა მინისტრების შეხვედრა მიმდინარეობს. მინისტრებმა უკრაინისთვის მხარდაჭერასა და მადრიდის სამიტზე მისაღებ კონცეფციაზე უნდა იმსჯელონ. მინისტერიალის პირველ დღეს დიპლომატები შეხვდნენ კოლეგებს ფინეთიდან და შვედეთიდან. ფინეთი აპლიკაციის წარდგენას მომავალ წევრობაზე ხვალ აპირებს.