ზუგდიდში, საოკუპაციო ხაზთან მდებარე სოფელ რუხში სოხუმის დაცემის დღე სიმბოლური შეკრებითა და მდუმარე აქციით აღნიშნეს.
ადგილობრივი ხელისუფლების წარმომადგენლებმა ახალგაზრდებთან ერთად კიდევ ერთხელ გაიხსენეს ერთ-ერთი უმძიმესი დღე საქართველოს ისტორიიდან. მდუმარე აქციას, რომლის ფარგლებშიც სანთლებით დაწერეს – „ჩავჭიდოთ ერთმანეთს ხელები“, ზუგდიდის მერთან ერთად, სახელმწიფო რწმუნებულის მოადგილეები დაესწრნენ.
ზუგდიდის მერის განცხადებით, შეკრებილების მთავარი გზავნილი აფხაზი დებისა და ძმებისთვის არის – მშვიდობიან საქართველოში ერთად ცხოვრება.
„27 სექტემბერი სოხუმის დაცემის დღეა, რომელიც ჩაიწერა ჩვენი ქვეყნის უახლოეს ისტორიაში, როგორც ყველაზე ტრაგიკული და ტკივილიანი რიცხვი. ამ ტკივილიან დღეს ჩვენს აფხაზ და-ძმებს ვუწვდით მეგობრობის ხელს და ვეუბნებით – სიყვარულით ჩავჭიდოთ ერთმანეთს ხელები“, – განაცხადა ზუგდიდის მუნიციპალიტეტის მერმა, მამუკა წოწერიამ.
27 სექტემბერს სოხუმის დაცემიდან 29 წელი სრულდება.