გამოძიების პროცესში ვერავის დაკავებას ვერ გამოვრიცხავ, – ასე უპასუხა მთავარი პროკურორის მოადგილე გიორგი გოგაძემ ჟურნალისტების კითხვას, თუ რამდენად მოსალოდნელია პატრიარქის დაცვის ყოფილი უფროსის სოსო ოხანაშვილის დაკავება.
როგორც ამასთან დაკავშირებით გოგაძემ განმარტა, თუკი დადგება მტკიცებულებები ნებისმიერი პირის მიმართ, რომ მას ბრალი მიუძღვის დანაშაულის ჩადენაში, შესაბამისი რეაგირება მოხდება. აქვე გოგაძემ ხაზგასმით აღნიშნა, რომ აღნიშნულ განმარტებას ის აკეთებს ზოგადად და არა კონკრეტულად სოსო ოხანაშვილთან დაკავშირებით.
„სოსო ოხანაშვილი გამოძიების ფარგლებში ერთხელ უკვე დაიკითხა. შესაძლოა, ეს კიდევ გახდეს საჭირო. თუკი ჩვენთვის საინტერესო კონკრეტული საკითხები გამოიკვეთება, შესაბამის რეაგირებას მოვახდენთ“, – განუცხადა ჟურნალისტებს გიორგი გოგაძემ.
ამასთან, მთავარი პროკურორის მოადგილე ე.წ. ციანიდის საქმეზე სახალხო დამცველის შეფასებებსაც გამოეხმაურა. მისი თქმით, სახალხო დამცველის მხრიდან გამოთქმული მოსაზრებები არის ცალმხრივი, რადგან მას პროკურატურისათვის არ მიუმართავს და პროკურატურისგან ინფორმაცია არ გამოუთხოვია.