“ჩემით რეკლამა გაიკეთეს და მიმაგდეს“ – ალექსანდრე ბუზალაძის “ერთ ღამეში შეცვლილი ცხოვრება“

დიახ, თამამად შეიძლება ითქვას – აღმოჩენა, რადგან ბევრისთვის არც თუ ისე ცნობილმა ამ მიკროსაფინანსო ორგანიზაციამ ამ ბიჭის წყალობით არნახული ცნობადობა მოიპოვა.
ეს ბიჭი კი 21 წლის ალექსანდრე ბუზალაძეა, რომელმაც  2016 წლის 14 ნოემბრის ღამეს მიკროსაფინანსო ორგანიზაცია „ჯეოკაპიტალის“ თბილისის ფილიალის წინ ავტომანქანის მიერ წაქცეული ქოთანი წამოაყენა და გადმოვარდნილი მცენარეს გულმოდგინედ მოუარა… ალექსანდრემ ეს სრულიად უანგაროდ გააკეთა, თუმცა ამ საქციელისთვის “ჯეოკაპიტალმა“ მასზე სოციალურ ქსელში “ძებნა გამოაცხადა“, რამდენიმე დღეში იგი იპოვა და გულუხვადაც “დაასაჩუქრა“…
“ჯეოკაპიტალის“ ხელმძღვანელობამ ალექსანდრე ბუზალაძეს სხვადასხვა სიმბოლური საჩუქრები გადასცა და, რაც ყველაზე მნიშვნელოვანია, მათთან თანამშრომლობა შესთავაზა… გარდა ამისა, ორგანიზაციამ გაავრცელა ინფორმაცია, რომ ალექსანდრეს სრულად დაუფინანსა სწავლა დრამისა და კინოს მსახიობის სასწავლო კურსზე, საქართველოს შოთა რუსთაველის თეატრისა და კინოს სახელმწიფო უნივერსიტეტის სასწავლო ცენტრში… ეს იყო ყველაზე მნიშვნელოვანი საჩუქარი 21 წლის გორელი ბიჭისთვის, რომელიც მთელი ცხოვრება მსახიობობაზე ოცნებობდა… ყველამ გაიგო, რომ “ჯეოკაპიტალმა“ ალექსანდრე ბუზალაძის ცხოვრება ერთ ღამეში შეცვალა… თავად ალექსანდრეც ასე ფიქრობდა მანამ, სანამ…  მოკლედ, ამ ფაქტიდან 5 თვის შემდეგ ახალგაზრდამ სოციალურ ქსელში შემდეგი შინაარსის სტატუსი გამოაქვეყნა:
“მეგობრებო, ძალიან გვჭირდება თქვენი დახმარება – გვაპოვნინოთ ის კეთილი ადამიანი, რომელმაც არ დაიზარა და 14 ნოემბერს, ღამის პირველ საათზე, მიკროსაფინანსო კომპანია „ჯეოკაპიტალი“-ს თბილისის ფილიალის წინ (აკ.წერეთლის გამზირი #55) ავტომანქანის მიერ გადმოყირავებული ქოთანი გაასწორა და მცენარე დააბრუნა ქოთანში, თან ისიც კი არ დაიზარა, რომ მიწაც ჩაეყარა მცენარისთვის. გვინდა ამ ახალგაზრდას და სამაგალითო მოქალაქეს გადავუხადოთ სათანადო მადლობა და ამით შევახსენოთ სხვებსაც, რომ კეთილი საქმე არასდროს რჩება შეუმჩნეველი და რომ #სიკეთეგადამდებია“  – ეს სიტყვები მიკროსაფინანსო ორგანიზაცია “ჯეოკაპიტალს” ეკუთვნის. მინდა კიდევ ერთხელ ხაზგასმით ავღნიშნო რომ ეს ფაქტი მართლაც ბუნებრივი და სპონტანური იყო. 4 აპრილს 5 თვის შემდეგ შევწყვიტე თანამშრომლობა ამ ორგანიზაციასთან გარკვეული მიზეზების გამო. სამწუხაროდ “ჯეოკაპიტალმა” ისარგებლა შემთხვევით და თავისივე სასარგებლოდ გამოიყენა ვიდეო ჩანაწერი, რომელმაც ძალიან დიდი რეკლამა მოუტანა “ჯეოკაპიტალს”. მე დამარწმუნა ამ ორგანიზაციამ ძალიან ბევრი მიზეზების გამო, რომ #სიკეთეგადამდები კი არა მათ შემთხვევაში  #სიკეთეგამოყენებადია.“
ალექსანდრე ბუზალაძე ამბობს, რომ ამ 5 თვის განმავლობაში გულისტკივილის არაერთი მიზეზი დაუგროვდა.
“ჯეოკაპიტალის“ ხელმძღვანელებმა თავად შემომთავაზეს თანამშრომლობა, მითხრეს რომ ორგანიზაციის სახე გავხდებოდი, მაგრამ 5 თვის განმავლობაში მხოლოდ ერთხელ მქონდა გადაღება… დირექტორს რომ მივწერე ხელშეკრულებას ხომ არ ვაუქმებთ-მეთქი, პასუხიც კი არ დამიბრუნა… მათ არც ჩემი სწავლა დაუფინანსებიათ… ამაზეც არასწორი იმფორმაცია მიაწოდეს საზოგადოებას… დამიფინანსეს მხოლოდ საგამოცდო ტურები… თავი სტუდენტი მეგონა და საგამოცდო ტურებზე აღმოვჩდი. ახლა ვხვდები, რომ ჩემით რეკლამა გაიკეთეს და მიმაგდეს ჩვეულებრივად… ამას მერჩივნა მოსულიყვნენ და ეთქვათ – “მადლობა, ალექს“ და არა ამდენი ამბავი, რომელსაც სინამდვილეში გაგრძელება არ ჰქონია. არ გეგონოთ რამეს ვითხოვდე… არა, უბრალოდ, მინდა ყველამ გაიგოს რომ სიკეთე გამოყენებადი არ უნდა იყოს“, – ამბობს ალექსანდრე ბუზალაძე.