ალადაშვილის კლინიკაში აუდიტის სამსახურის ხელმძღვანელთან, რომელსაც ორი დღის წინ თავს დაესხნენ, პროკურორები იმყოფებიან. ლაშა თორდია დაკითხვისთვის მზად არის. ამის შესახებ რამდენიმე წუთის წინ მისმა ცოლმა განაცხადა.
სახელმწიფო აუდიტის სამსახურის ხელმძღვანელ ლაშა თორდიაზე განხორციელებულ თავდასხმაზე შინაგან საქმეთა სამინისტრომ გამოძიება დაიწყო.
სამინისტროს ცნობით, მომხდართან დაკავშირებით გამოძიება სისხლის სამართლის კოდექსის 126-ე მუხლის პირველი ნაწილით დაიწყო, რაც სისტემატურ ცემას ან სხვაგვარ ძალადობას გულისხმობს, რამაც დაზარალებულის ფიზიკური ან ფსიქიკური ტანჯვა გამოიწვია, მაგრამ არ მოჰყოლია ამ კოდექსის 117-ე ან 118-ე მუხლით გათვალისწინებული შედეგი.
ქმედება ისჯება თავისუფლების შეზღუდვით ვადით ორ წლამდე, ან თავისუფლების აღკვეთით ვადით ერთიდან სამ წლამდე.
ლაშა თორდიაზე თავდასხმა 12 მაისს, თბილსში შარდენის ქუჩაზე მდებარე ღამის კლუბ “ელ ცენტროში” მოხდა. თორდიას თქმით, მასზე თავდასხმა ყოფილმა მთავარმა პროკურორმა ოთარ ფარცხალაძემ განახორციელა.