“რამდენიმე ხნის მეგობრობა მაკავშირებს ლევან ვარშალომიძესთან. მეგობრობას ვერ დავარქმევ, უბრალოდ ვახლობლობთ. არც ისე დიდი ხანია,“ -განაცხადა ყოფილმა პატრულ-ინსპექტორმა გია ხალვაშმა “აიპრესთან” საუბრისას.
გია ხალვაში ე.წ ბათუმის მოვლენების შემდეგ, მალევე, გენერალური ინსპექციის დასკვნის საფუძველზე სამსახურიდან გაათავისუფლეს. დღეს ინტერნეტში გია ხალვაშისა და “ნაციონალური მოძრაობის“ ლიდერის, ლევან ვარშალომიძისფოტოები გამოქვეყნდა, რომელიც ერთიანი ნაციონალური მოძრაობის შეკრებაზეა გადაღებული.
“აიპრესის“ კითხვაზე – დიდი ხანია მეგობრობს თუ არა, ყოფილი პატრულ ინსპექტორი ვარშალომიძესთან. ხალვაშმა განმარტა, რომ მასთან ახლობლობს და სამსახურიდან გათავისუფლების შემდეგ ,,ნაცმოძრაობა“ ერთადერთ ძალად მიიჩნია, რომელიც უსამართლობას ებრძვის და გადაწყვიტა მათ გვერდით იბრძოლოს.
“პოლიტიკურ სიტუაციებში არასდროს ჩავრეულვარ, ბოლო დროს დავინტერესდი და ჩავერიე. უკანონოდ გამათავისუფლეს. “ნაციონალურ მოძრაობასთან ერთად გადავწყვიტე ვებრძოლო ამ უკანონობას და ამიტომ ვარ უკვე მათ გვერდით. ძალიან დიდი თემაა ჩემი სამსახურიდან გათავისუფლების მიზეზი. ეს ყველაფერი უკანონოდ მოხდა. მე არასდროს ვყოფილვარ არცერთი პოლიტიკური მოძრაობის მხარდამჭერი. უბრალოდ მეგობრები და ახლობლები მყავს ყველგან, ყველა პარტიაში და ვმეგობრობდი მათთან.
ამ სამსახურიდან გათავისუფლების შემდეგ ერთ -ერთი ძალა, რომელიც დავინახე რომ უკანონობასთან შეეძლო ბრძოლა იყო ,,ნაციონალური მოძრაობა“ და გადავწყვიტე მათთან ერთად ვყოფილიყავი,“- განაცხადა გია ხალვაშმა “აიპრესთან” ცნობისთვის, გია ხალვაში ის პატრულ ინსპექტორი იყო, რომელმაც ბათუმში მოქალაქეები დააჯარიმა,რასაც პროტესტი და ბოლოს არეულობა, დაპირისპირება და ფართომასშტაბიანი აქცია მოჰყვა ქალაქში.
შეგახსენებთ, რომ 11 მარტს დაჯარიმებული მოქალაქეების, ჯიმი ვარშანიძისა და რამაზ ხიმშიაშვილის საქმეს მოსამართლე გოჩა ფუტკარაძე განიხილავდა. ისინი საპატრულო პოლიციამ 11 მარტს პლაზას მიმდებარე ტერიტორიაზე დააჯარიმა, ხოლო შემდეგ დააკავა. ამ ფაქტს მოჰყვა მასობრივი საპროტესტო აქცია ბათუმში.
თავდაპირველად, 11 მარტს, საღამოს 5 საათზე, პატრულმა რამაზ ხიმშიაშვილი დააჯარიმა 50 ლარით, რადგან მას პლაზასთან მდებარე ლომბარდთან, აკრძალულ ადგილზე ჰქონდა მანქანა დატოვებული. პატრულ-ინსპექტორმა, გია ხალვაშმა მაშინ მოსამართლეს უთხრა, რომ ჯარიმის გამოწერის პროცესში რამაზმა მისი და კიდევ ერთი პატრულის თანამშრომლის, მეგი ხუნწარიას მისამართით შეიგინა.
www.ipress.ge