სიტყვები ვერ გამოხატავს იმ მწუხარებას, რასაც ახლა ვგრძნობ, – ამის შესახებ ჟურნალისტებს საქართველოში აშშ-ის ელჩმა იან კელიმ თბილისის საერთაშორისო აეროპორტში განუცხადა, სადაც ავღანეთში დაღუპული ქართველი სამხედრო მოსამსახურე მდინარი ბებიაშვილი ჩამოასვენეს.
„სიტყვები ნამდვილად ვერ გამოხატავს იმ მწუხარებას, რასაც ახალგაზრდა ბიჭის დანაკარგის გამო ვგრძნობ. მან ძალიან დიდი წვლილი შეიტანა ჩვენი საერთო უსაფრთხოებისა და მშვიდობის საქმეში. გასულ კვირას, ამ ადგილად იმყოფებოდა ვიცე-პრეზიდენტი მაიკ პენსი, რომელსაც სურდა ამერიკელი ხალხის სახელით მადლიერება გამოეხატა ქართველი ჯარისკაცების მიმართ, რომლებიც იბრძვიან საერთაშორისო მშვიდობისა და სტაბილურობისთვის. მართლაც, დღეს ვხედავ, თუ რაოდენ დიდია ის ფასი, რასაც ისინი იხდიან ამ ბრძოლაში. გულითადად და ღრმა მწუხარებით ვუსამძიმრებთ სერჟანტ ბებიაშვილის ოჯახს დიდ დანაკარგს“, – განაცხადა იან კელიმ.