საქართველოში მყოფი უცხოელ დამკვირვებელთა ნაწილი თბითმმართველობის არჩევნებს და კენჭისყრის პროცესს დადებითად აფასებს.
სულ არჩევნებს 581 საერთაშორისო მონიტორი აკვირდებოდა, მათ შორის ლიტვის ცენტრალური საარჩევნო კომისიის 15 კაციანი ჯგუფი.
როგორც ჯგუფის ხელმძღვანელი განმარტავს, მათ რაიმე სახის სერიოზული დარღვევა არ შეუნიშნავთ.
„ჩვენ დადებითად ვაფასებთ პროცესს. გვქონდა თავისუფლად გადაადგილების საშუალება, შეგვეძლო როგორც კომისიის წევრებთან, ისე უბრალო ამომრჩევლებთან და ადგილობრივ დამკვირვებლებთან ავისუფლად საუბრის საშუალება.
ჩვენ 15 კაციანი ჯგუფით ჩამოვედით საქართველოში. რაიმე კანონდარღვევა არ შეგვინიშნავს, არ მოგვისმენია არც რაიმე საკითხზე ჩივილი და ეს ძალიან გვახარებს“, – განაცხადა ლიტვის ცენტრალური საარჩევნო კომისიის წევრმა და ჯგუფის ხელმძღვანელმა სვეტლანა მისევიჩინმა პირველ არხთან საუბრისას.
არჩევნების მიმდინარეობის პროცესზე ისაუბრა უკრაინის ცენტრალური საარჩევნო კომისიის წევრმა იგორ ჟედიენკომაც, რომელიც კენჭისყრის პროცესს.
„არჩევნები მეტწილად მშვიდ ვითარებაში მიმდინარეობდა. ყველაფერი ძალიან კარგად იყო ორგანიზებული. ჩვენ თბილისში ვაკვირდებოდით არჩევნებს და აქ დარღვევები, ჩვენ ყოველ შემთხვევაში, არ შეგვიმჩნევია. არის თუ არა სხვაგან დარღვევები, ამას ალბათ ცენტრალური საარჩევნო კომისია იტყვის. მოქალაქეებსაც შეუძლიათ მიმართონ საჩივრით სასამართლოს, მაგრამ უნდა ითქვას, რომ ყველაფერი ძალიან მაღალ დონეზე იყო ორგანიზებული“, – განაცხადა იგორ ჟედიენკომ პირველ არხთან საუბრისას.