აფხაზეთიდან ზუგდიდში 2 წლის და 9 თვის ბავშვი გადმოიყვანეს სამკურნალოდ. პატარა ბიჭი სავარაუდოდ, მამინაცვალმა ცემა. ბავშვს სახის და კისრის არეში ნაკაწრები, სილურჯეები და შეშუპება აღენიშნებოდა.
ბავშვი ზუგდიდის რეფერალურ საავადმყოფოში დედამ და ბაბუამ მიიყვანეს. ისინი ოკუპირებული აფხაზეთიდან გადმოვიდნენ, სადაც ოჯახი ცხოვრობს.
პაციენტს სუნთქვაც უჭირდა. რა ვითარებაში მიიღო მან დაზიანებები, ექიმებისთვის უცნობია. საეჭვო გარემოებიდან გამომდინარე, საქმეში სამართალდამცველები და სოციალური მომსახურების სააგენტო ჩაერთო.
კლინიკის ექიმის, მზია გერგედავას თქმით, ბავშვს სახეზე ესკორიაციები, შეშუპება, სილურჯე და რბილი ქსოვილის დაზიანება აღენიშნებოდა.
სამეგრელო-ზემო სვანეთის სოციალური დაცვის სააგენტოს იურისტ უტა მიქაძის განცხადებით, ბავშვი მინდობით აღზრდის ფარგლებში, ერთ-ერთ ოჯახში, ქართული მხარის მიერ კონტროლირებად ტერიტორიაზე იმყოფება.
„შეტყობინება მივიღეთ შინაგან საქმეთა სამინისტროდან. მას შემდეგ განვახორციელეთ კანონით გათვალისწინებული პროცედურები, რაც გულისხმობს იმას, რომ საავადმყოფოში მივიდა ჩვენი სოციალური მუშაკი.
ბავშვს აღენიშნებოდა სავარაუდო ძალადობა სხეულზე. ამ ეტაპზე მიმდინარეობს გამოძიება. ბავშვი კი მინდობით აღზრდის ფარგლებში ერთ-ერთ ოჯახში ქართული მხარის მიერ კონტროლირებად ტერიტორიაზე იმყოფება, დედას აქვს უფლება, ნებისმიერ დროს მოინახულოს“, – განაცხადა მიქაძემ.
არსებული ინფორმაციით, ბავშვის მამინაცვალი დაკავებულია.