„რადგან ბიძინა ივანიშვილი დარწმუნდა, რომ პროცესებში უნდა ჩაერთოს, ესე იგი, ჟივილ-ხივილი ტყუილად არ გაგვიმართავს“, – ამის შესახებ „ინტერპრესნიუსს“ საპარლამენტო უმრავლესობის წევრმა ალექსანდრე ქანთარიამ განუცხადა.
კითხვაზე, როგორ შეაფასებდა ის ყოფილი პრემიერის ივანიშვილის დაბრუნებას პოლიტიკაში პარტია „ქართული ოცნების“ თავმჯდომარის რანგში, ქანთარიამ კითხვითვე უპასუხა – „ეს გამოცხადდა უკვე?!“.
„ძალიან კარგია ეს ამბავი, რადგან ბიძინა ივანიშვილი არის უპირობო ლიდერი არა მარტო „ქართული ოცნების“, არამედ საზოგადოების დიდი ნაწილის და თუ ამის ნაკლებობა იყო, ესე იგი, კარგია, რაც მოხდა. რადგან ის დარწმუნდა, რომ პროცესებში უნდა ჩაერთოს, ესე იგი, ჟივილი-ხივილი ფუჭად არ გაგვიმართავს“, – განაცხადა ქანთარიამ.
დეპუტატი მიიჩნევს, რომ ივანიშვილი „ქართულ ოცნებას“ გააერთიანებს და ამავე დროს განსაკუთრებულ ცვლილებებს ელოდება.
„მე მგონი, ცვლილებები იქნება. დღეს ბიურო იყო შეკრებილი, რომელმაც შეიძლება ყველაფერზე ისაუბროს აბსოლუტურად, მაგრამ გადაწყვეტილებებს იღებს პოლიტსაბჭო. პარტიულ გადაწყვეტილებას დღევანდელ სხდომაზე ვერ მიიღებდნენ, მაგრამ რადგან ეს ინფორმაცია ითქვა, მე მივესალმები“, – აღნიშნა ქანთარიამ.
ყოფილი პრემიერ-მინისტრი ბიძინა ივანიშვილი პარტია „ქართული ოცნება – დემოკრატიულ საქართველოს“ უხელმძღვანელებს, – ამის შესახებ დღევანდელ ბრიფინგზე საქართველოს პრემიერმა და პარტიის ამჟამინდელმა ლიდერმა გიორგი კვირიკაშვილმა განაცხადა.
„პირადად ჩემი და მთელი გუნდის სახელით შევთავაზე და ვთხოვე ჩვენი პარტიის დამფუძნებელს, რომ სათავეში ჩაუდგეს პარტიას. მოხარული ვარ, რომ ბატონმა ბიძინა ივანიშვილმა თანხმობა განაცხადა“, – აღნიშნა კვირიკაშვილმა.