თბილისის ზღვაზე არსებულ დევნილთა დასახლებაში, ე.წ. კადეტთა კორპუსებში ინფრასტრუქტურული სამუშაოები შესრულდა. N2 კორპუსში სადარბაზოს რემონტი 720 კვ.მ ფართობზე განხორციელდა, N6 კორპუსში კი 800 კვ.მ ფართობზე ქანობიანი სახურავი შეიცვალა.
ბინათმესაკუთრეთა ამხანაგობების განვითარების ხელშეწყობის პროგრამის ფარგლებში შესრულებულ სამუშაოებს ნაძალადევის რაიონის გამგებელი ირაკლი ხელაძე გაეცნო.
„დევნილთა დასახლებებში გამგეობა ინფრასტრუქტურული პრობლემების მოგვარებას განაგრძობს. ამ ეტაპზე, ე.წ. კადეტთა კორპუსებში სადარბაზოების რემონტი და სახურავის რეაბილიტაცია განხორციელდა. გასულ წელს აღნიშნულ დასახლებაში საბავშვო გასართობი ატრაქციონები მოეწყო. ასევე, სამი საცხოვრებელი შენობის მიწისქვეშა კომუნიკაციები შეიცვალა და სადარბაზოები მოწესრიგდა N3, N4 კორპუსებში. ამ მისამართზე წლის ბოლომდე სავარჯიშო ტრენაჟორებიც დამონტაჟდება“, – განაცხადა ირაკლი ხელაძემ.
აღნიშნულ დასახლებაში სულ ექვსი საცხოვრებელი კორპუსია, სადაც 650-მდე დევნილი ცხოვრობს.