გარიცხვაზე, წასვლაზე, მოსვლაზე საერთოდ არ დასმულა საკითხები, – ამის შესახებ საპარლამენტო უმრავლესობის წევრმა ეკა ბესელია „ქართული ოცნების“ ოფისში უმრავლესობის შეხვედრის დასრულების შემდეგ განაცხადა.
დეპუტატმა კონკრეტულ დეტალებზე საუბრისგან თავი შეიკავა,თუმცა, აღნიშნა, რომ პარტიიდან ვინმეს გარიცხვის საკითხი შეხვედრაზე არ დასმულა. მისივე თქმით, ბიძინა ივანიშვილმა დღეს მედიატორის ფუნქცია შეასრულა და მანამდე გაკეთებული განცხადება, რა დროსაც, მან ბესელია გუნდურობის პრინციპის დარღვევაში დაადანაშაულა, არ გაუმეორებია.
„გარიცხვაზე, წასვლაზე, მოსვლაზე საერთოდ არ დასმულა საკითხები. მე ძალიან გთხოვთ, ასე ნუ დააპატარავებთ ამ მნიშვნელოვან პროცესს, რადგან აქამდე არ დადის ეს ყველაფერი და არ არის საუბრის ის ფორმა, რაც ერთმანეთს უნდა ვაკადროთ. განვლილ პროცესებზეც გვქონდა მსჯელობა. არის საკითხები, რასაც ერთანირად ვუყურებთ, არის საკითხები, რაზეც შეიძლება გვქონდეს განსხვავებული მოსაზრება და ესეც ნორმალურია“, – განუცხადა ბესელიამ ჟურნალისტებს.
ამასთან, ჟურანლისტის რეპლიკაზე, რომ ის საკმაოდ აღელვებული ჩანს, ბესელიამ უპასუხა, რომ ის უბრალოდ დაღლილია.