“მერია წამოვიდა შემხვედრ წინადადებაზე, რისთვისაც მინდა, მადლობა გადავუხადო, რომ დაძაბულობა და დაპირისპირებაც მოგვაშორა”, – ამის შესახებ ბიზნესმენმა, სასტუმრო “ბუდაპეშტის” მფლობელმა გოგა ზაქაიძემ დღეს ქალაქის მერთან, კახა კალაძესთან შეხვედრის შემდეგ განაცხადა.
მისივე თქმით, კომპანიამ შემოთავაზებული ჩამონათვალიდან ადგილმონაცვლეობის გადაწყვეტილება მიიღო. როგორც მან აღნიშნა, არსებითი მნიშვნელობა არ აქვს მათი ბიზნესპროექტი ვაკის პარკის მიმდებარედ, თუ გლდანში ან ვარკეთილში განხორციელდება.
„მოხარული ვარ, რომ მოლაპარაკებები დასრულდა. ჩვენთვისაც რთული იყო ექვსი წელი ამ პროცესებში ყოფნა. მერია წამოვიდა შემხვედრ წინადადებაზე, რისთვისაც მინდა, მადლობა გადავუხადო, რომ დაძაბულობა და დაპირისპირებაც მოგვაშორა. მოვილაპარაკეთ, რომ კონკრეტულ ობიექტებზე, კონკრეტულ მიწის ნაკვეთებზე შევთანხმდებით. არის რაღაც ჩამონათვალი და ჩვენმა კომპანიამაც მიიღო გადაწყვეტილება, დავთანხმდეთ ადგილმონაცვლეობას ან გამოსყიდვას. გვაქვს ალტერნატივა, ავირჩიოთ შემოთავაზებულიდან, რაც ჩვენთის მისაღებია და რამდენიმე დღეში დავასრულებთ ამ პროცესს. შემოთავაზებული წინადადებები ადეკვატურია და გვაკმაყოფილებს.
ჩვენთვის არ აქვს მნიშვნელობა ბიზნესს ვაკის პარკის მიმდებარედ გავაკეთებთ, თუ გლდანსა და ვარკეთილში“, – განაცხადა გიგა ზაქაიძემ.
შეგახსენებთ, თბილისის მერმა, კახა კალაძემ დღეს „ბუდაპეშტის“ მფლობელთან შეხვედრის შემდეგ განაცხადა, რომ ინვესტორთან შეთანხმება შედგა და ვაკის პარკში სასტუმრო არ აშენდება.