ჭიდაობის ფედერაციის პრეზიდენტი გეგა გეგეშიძე ჟურნალისტ დავიტ ერაძესთან დაკავშირებულ ინციდენტს ემიჯნება, ტელეკომპანია “რუსთავი 2”-ს ცრუ ინფორმაციის გავრცელებაში ადანაშაულებს და საგამოძიებო უწყებებს მიმართავს.
გავრცელებულ განცხადებაში გეგეშიძე როგორც პირადი, ასევე ჭიდაობის ფედერაციის ღირსების შელახვაზე და მიზანმიმართულ კამპანიაზე საუბრობს.
“დღეს ტელეკომპანია რუსთავი 2 მა ჩემსა და ფედერაციის მიმართ კიდევ ერთხელ გაავრცელა ცილის წამებლური და ღირსების შემლახავი ინფორმაცია თითქოს ჟურნალისტი დავით ერაძის სახლზე რაღაც ტიპის თავდასხმის უკან მოვიაზრები მე ან რომელიმე ჩემი თანაგუნდელი. ხაზგასმით ვაცხადებ, რომ ეს არის მორიგი სიბინძურე, ჩემი და ფედერაციის ღირსების და საქმიანი რეპუტაციის შელახვა. კატეგორიულად მოვუწოდებ საგამოძიებო ორგანოებს სასწრაფოდ დადგინდეს მართლა ჰქონდა თუ არა დანაშაულს ადგილი ჟურნალისტ დავით ერაძის მიმართ, ვინ დგას ამ დანაშაულის უკან, რა მიზნები ამოძრავებდათ მათ, ხომ არ არის ეს შეგნებულად გაკეთებული იმისათვის რომ მთელი ეს ღირსების შემლახავი კამპანია კიდევ ერთხელ მიემართათ ჩემი და ფედერაციის წინააღმდეგ. აქვე მინდა დავაფიქსირო ჩემი პატივისცემა ჟურნალისტ დავით ერაძის მიმართ რომელიც სპორტულ ჟურნალისტიკაში მართლაც რომ გამორჩეული ჟურნალისტია და ეჭვი მაქვს რომ გარკვეული ძალები ცდილიბენ მის ჩათრევას ამ ბინძურ პროვოკაციაში.
შექმნილი სიტუაციისა და 2019 წლის 11 იანვარს სპორტის სასახლეში განვითარებული მოვლენების გამო საოგადოებას ვუხდი ბოდიშს და ჩემი და ფედერაციის გულშემატკივრებს მადლობა. პატივისცემით, გეგა გეგეშიძე” – ნათქვამია გეგა გეგეშიძის განცხადებაში.
“რუსთავი 2”-ის ჟურნალისტის, დავით ერაძის სახლზე შესაძლო თავდასხმის, შესაძლო გასროლის საქმეზე გამოძიებას შინაგან საქმეთა სამინისტრო აწარმოებს. რაც შეეხება გეგა გეგეშიძეს, ჭიდაობის ჩემპიონატზე მომხდარი ინციდენტის შემდეგ მას ბრალი ძალადობის მუხლით წაუყენეს. სპორტსმენთა ნაწილი, მათ შორის ნაკრების კაპიტანი და ინციდენტის ერთ-ერთი მონაწილე ზურაბ დათუნაშვილი მის თანამდებობიდან გადადგომას მოითხოვს. გეგეშიძე სასამართლომ გირაოს სანაცვლოდ გაათავისუფლა.
წყარო : primetime.ge