ეკა ხოფერია სოციალურ ქსელში სტატუსს აქვეყნებს, რომლის დაწერაზეც დიდხანს ფიქრობდა. ჟურნალისტი აღნიშნავს, რომ ცოტა ხნის წინ მისი გამოცემა მცირე გაუგებრობაში აღმოჩნდა და რამდენიმე ადამიანის სახეც სწორედ მაშინ დაინახა.
გთავაზობთ ეკას სტატუსს:
„ამ სტატუსის დაწერა ადრეც მინდოდა, გადავიფიქრე, ახლა დროც გავიდა და გადმოვიფიქრე)
ამას წინათ ერთი მცირე გაუგებრობა შეხვდა ჩემს ერთ-ერთ გამოცემას, საქმე მართლა გაუგებრობასთან გვქონდა, მე არ ვიყავი საქართველოში და რაღაც საკითხი ვერ გავაკონტროლე ბოლომდე. არაფერი ძლიერ განსაკუთრებული. არ მინერვიულია , არ მიდარდია, ჩვეულებრივ მოვეკიდე, როგორც შეცდომას, პრობლემას და შესაბამისად მის გამოსწორებას.
უფრო საინტერესო მერე დაიწყო. ადამიანები, ზოგი ნაცნობი, აი, კარგი გამარჯობით რომ ესალმები, ზოგიც ჩემთან რომ უმუშავია, ზოგიც ერთხელ თუ ორჯერ უთანამშრომლია, ხელების სასიამოვნო ფშვნეტით ამ ამბავს გახარებულ-გადარეულები თავის კედლებზე აშეარებდნენ. თან როგორ იცით, ანუ ცუდ ამბავში კი არა, ამბავს ვაშეარებ კაცო უბრალოდ და მერე კომენტარებში რომ ვიღაც გაგაკრიტიკებს, ეგ ახლა რა ჩემი ბრალია. ხო იცით, როგორც ხდება)
ბევრი არა, მართლა სულ 3 თუ 4 ადამიანი იყო ასეთი. ჰოდა, ვეუბნები ჩემს ახლობელს, წარმოიდგინე, ერთი გაუგებრობა მოხდა და ასე უცებ როგორ გამოავლინეს თავი ადამიანებმა და შენ წარმოიდგინე, ნაღდად სერიოზული პრობლემა რომ შემხვედროდა, რას იზამდნენ. ამ „აღმოჩენამ“ მაგრად დამაფიქრა და ცხადია, ვინერვიულე.
ვინ არის ჩვენ შორის იდეალური და ყველაზე კეთილი? არც არავინ, მაგრამ ერთი ცნობილი ფილმის გმირის არ იყოს, მე ვეცადე მაინცო.
მეც ვცდილობ.
სხვისმა პრობლემამ, წაბორძიკებამ რატომ უნდა გამახაროს, ვერ ვხვდები. მთავარი ხომ ისაა, შენ ვინ ხარ და შენ რისი გამკეთებელი ხარ. ჰოდა, ბევრია ასეთი ჩვეულებრივი და კარგი ადამიანი და ვიმეგობროთ. ჩემი იმედი ყოველთვის გქონდეთ.
ეპილოგი
მოგცლია ერთი შენ, აი, ამხელა სტატუსი რომ ამ თემას მიუძღვენი, მეტყვის ერთი ჩემი მეგობარი. მართალია, მომცლია, მაგრამ აბა, რამდენის სათქმელი ვთქვი?
და მეორეც ზოგჯერ სათქმელი უნდა ითქვას. თუ არა?“
შეგახსენებთ, მცირე ხნის წინ საზოგადოების ნაწილის უკმაყოფილება გამოიწვია ჟურნალ „სითიში“ სამთავრობო სტრუქტურების პიარსამსახურების უფროსების გამოჩენამ რუსული მაიონეზის რეკლამაში. როგორც ეკა ხოფერიამ მოგვიანებით აღნიშნა, ალბათ, ჯობდა, ამ ტიპის „პროდაქტ პლეისმენტში“ მთავრობის წარმომადგენლების გადაღებისგან თავი შეეკავებინათ.