პირადი ცხოვრების მასალების გავრცელებასთან დაკავშირებით პარლამენტის ვიცე-სპიკერი ირმა ინაშვილი კომენტარს აკეთებს და მიიჩნევს, რომ მ დანაშაულის ჩამდენი პირებისთვის სასჯელის უმკაცრესი ზომა უნდა იქნას გამოყენებული.
“ადამიანთა (ვინც უნდა იყოს, პოლიტიკოსი, თუ არაპოლიტიკოსი) პირადი ცხოვრების ამსახველი მასალის გადაღებაზე, გავრცელებაზე, შენახვა- დაარქივებაზე, კომენტირებაზეც კი, კანონმდებლობა უნდა გამკაცრდეს და უნდა იყოს გამოყენებული უვადო პატიმრობის მუხლი.
დამკვეთებზეც და შემსრულებელზეც!!! მითუმეტეს, თუ ჯგუფური მოქმედებაა განხორციელებული. ადამიანის პირად ცხოვრებასთან შეხება,- ესაა მისი მორალური განადგურების მცდელობა, რაც ფიზიკურ განადგურებასაც გულისხმობს. ამავდროულად, ესაა წამების უმძიმესი ფორმა, რაც ზიანს აყენებს არა მარტო ამ კონკრეტულ ადამიანს, არამედ მის ოჯახს და, საბოლოო ჯამში, საზოგადოებას, ამიტომ ორი კომბინირებული გზაა. პირველი- საზოგადოებამ თავად უნდა თქვას, რომ ადამიანების პირადი ცხოვრების ამსახველი მასალები მასზე გავლენას ვერ მოახდენს, რომ ეს ამაზრზენი და მიუღებელია (კარგია, რომ საქართველოში ეს უკვე ხდება) და მეორე- ვიმეორებ, უნდა გამკაცრდეს კანონმდებლობა! არავითარი დანდობა მათ, ვინც ადამიანების პირად ცხოვრებას ბოროტ იარაღად იყენებს.
ცხადია, ყველას გვესმის, რომ პირად ცხოვრებაზე აქცენტირებით ყურადღება მთავარი თემიდან მეასეხარისხოვან თემაზე გადადის, ამიტომ საჭიროა ამ ბოროტებისგან მორალური დისტანცირება და საჭიროა კანონმდებლობის გამკაცრება! ტრაგედიაა, როცა პირადი ცხოვრების მასალების გავრცელებით პედაგოგები არიან დაკავებულნი. ასეთმა პედაგოგმა მოსწავლესა და სტუდენტს რა უნდა ასწავლოს?!
P.S. ამ მანკიერებაზე მამაკაცმა პოლიტიკოსებმა (ზოგიერთმა დეპუტატმაც) ტუჩების პრუწვით კი არ უნდა ისაუბრონ, ქვეტექსტებით და ა.შ. ხმა უნდა აღიმაღლონ და კანონის გამკაცრების ინიციატორებად უნდა გამობრძანდნენ, გაიხსნება თუ არა პარლამენტის პლენარული სხდომა.”-აცხადებს ირმა ინაშვილი.