ეკა ბესელია – მე ადამიანს არასოდეს ვუკარგავ სიკეთეს

დეპუტატ ეკა ბესელიას განცხადებით, საპარლამენტო უმრავლესობის წევრთა შეხვედრაზე, ბიძინა ივანიშვილს კადრების გავრცელების საკითხთან დაკავშირებით ესაუბრა.
თუმცა, მისი თქმით, ის არ აპირებს, რომ გაასაჯაროოს, თუ რა შინაარსის საუბარი შედგა მასსა და პარტიის თავმჯდომარეს შორის.
“მე ადამიანს არასოდეს ვუკარგავ სიკეთეს, ვინც არ უნდა იყოს ეს და მით უმეტეს ბიძინა ივანიშვილი, რომელსაც ობიექტურად ბევრი სიკეთე აქვს ამ ქვეყნისთვის გაკეთებული. ყველას მაგივრად პასუხის მოთხოვნა არასწორია, მაგრამ რაც მისი წილი პასუხისმგებლობაა მე მას ამის თაობაზე, რა თქმა უნდა, პირადად ვეუბნები და არ მიჭირს მასთან ამაზე საუბარი. პასუხისმგებლობაა მისი, პირველ რიგში როგორც პარტიის ლიდერის და თავმჯდომარის, რომ ეს შიდა საკითხები, რომლებიც ისე გაღრმავდა რომ გარეთ გამოვიდა, ეს როგორღაც ისე დალაგდეს, რომ სამართლიანი იყოს გადაწყვეტილებები“, – ამბობს ბესელია.
მისივე თქმით, ის თავის განცხადებებში რადიკალური არ არის, რადგან დეპუტატის თქმით, უფრთხილდება იმ შვიდ წელს, რომელიც მას როგორც პოლიტიკოსსა და ადამიანს გუნდთან აკავშირებდა.