ირმა ინაშვილი – საქართველოში რაც ხდება, არის წარსულის ძალიან მძიმე მემკვიდრეობა

„საქართველოში რაც ხდება, წარსულის ძალიან მძიმე მემკვიდრეობაა, მემკვიდრეობა იმ 80 ათასი ფაილის, რომელიც იწერებოდა“, – ამის შესახებ განცხადებას საქართველოს პარლამენტის ვიცე-სპიკერი, ირმა ინაშვილი აკეთებს და სოციალურ ქსელში პოლიტიკოსების პირადი ცხოვრების ამსხველი ფარულ ჩანაწერების თემას ეხმაურება.
მისივე განმარტებით, პირადი ცხოვრების ამსახველი ვიდეო-ფაილები ყოფილი ხელისუფლების პირობებში არქივდებოდა.
ირმა ინაშვილი ამბობს, რომ პირადი ცხოვრება ხელშეუხებელია და ადამიანს იცავს საქართველოს კონსტიტუცია და არაერთი საერთაშორისო აქტი.
„საქართველოში რაც ხდება, არის წარსულის ძალიან მძიმე მემკვიდრეობა და მემკვიდრეობა იმ 80 ათასი ფაილის, რომელიც იწერებოდა და არქივდებოდა ყოფილი ხელისუფლების პირობებში. ჩვენ უნდა ვილაპარაკოთ იმაზე, რომ დღეს კვლავ დაუცველია ჩვენი საზოგადოება. ვფიქრობ, ამ კუთხით კანონმდებლობა აუცილებლად გასამკაცრებელია, რათა დამკვეთი დაისაჯოს განსაკუთრებულად, ვინც არის ორგანიზებული ჯგუფის შემქმნელი და ორგანიზებას უწევს ფარული კადრების გავრცელებას“, – განაცხადა ირმა ინაშვილმა.
შსს-მ პირადი ცხოვრების ამსახველი ვიდეოჩანაწერის შენახვისა და მასობრივად გავრცელების ბრალდებით 16 პირი პირველ თებერვალს დააკავა. ამავე დღეს, შსს-მ დააკავა პირი, რომელმაც უწყების ცნობით, პირადი ცხოვრების ამსახველი ვიდეოჩანაწერი „იუთუბზე“ ატვირთა.
პირადი ცხოვრების ამსახველი ფარული კადრების უკანონოდ მოპოვება-გავრცელება-შენახვის საქმეზე სამ ბრალდებულს აღკვეთის ღონისძიებად პატიმრობა შეეფარდა, 14 კი გირაოს სანაცვლოდ გათავისუფლდა.