საქართველოს საგარეო საქმეთა მინისტრის დავით ზალკალიანის და რესპუბლიკელი სენატორის რონ ჯონსონის შეხვედრის დროს საუბარი აშშ-საქართველოს სტრატეგიული პარტნიორობის კიდევ უფრო გაღრმავებას, ამერიკის პოლიტიკურ დღის წესრიგში საქართველოს მნიშვნელოვან ადგილს და სამომავლოდ თანამშრომლობის განვითარების შესაძლებლობებს დაეთმო. ინფორმაციას საქართველოს საგარეო საქმეთა სამინისტრო ავრცელებს.
უწყების ცნობით, მინისტრმა მადლობა გადაუხადა სენატორს საქართველოს აქტიური მხარდაჭერისთვის, როგორც ნატო-ში ინტეგრაციის, ასევე საქართველოს სუვერენიტეტისა და ტერიტორიული მთლიანობის მიმართ. ამ მხრივ, მაღალი შეფასება მიეცა აშშ-ს კონგრესის მხრიდან ინიცირებულ საქართველოს მხარდამჭერ აქტს, ცალკეულ რეზოლუციებსა და განცხადებებს, რაც იმის გამოხატულებაა, რომ ამერიკის პოლიტიკურ დღის წესრიგში საქართველოს მნიშვნელოვანი ადგილი უკავია. შეხვედრაზე მაღალი შეფასება მიეცა საქართველოს პროგრესს დემოკრატიული რეფორმების, ეკონომიკური განვითარების, თავდაცვისა და უსაფრთხოების განმტკიცებისა და ევრო-ატლანტიკური ინტეგრაციის მიმართულებით.
საუბარი შეეხო საქართველოს ოკუპირებულ რეგიონებში შექმნილ მდგომარეობას და რუსეთის აგრესიულ ქმედებებს რეგიონში. სენატორის მხრიდან კიდევ ერთხელ დაფიქსირდა მზაობა ხელი შეუწყოს ამერიკის კონგრესში საქართველოს მიმართ მხარდაჭერის შემდგომ გაძლიერებას, მათ შორის საქართველოს მხარდამჭერი აქტის დამტკიცების სახით.