პარლამენტში განათლების, მეცნიერების, კულტურისა და სპორტის მინისტრ მიხეილ ბატიაშვილს დღეს მოუსმენენ.
ბატიაშვილის მოსმენა დაგეგმილია როგორც პლენარული სხდომის ფორმატში, ასევე განათლებისა და მეცნიერების კომიტეტში.
უმრავლესობის წევრებს მიხეილ ბატიაშვილთან შეკითხვები ექნებათ საგანმანათლებლო რეფორმებთან დაკავშირებით.
როგორც დეპუტატმა მარიამ ჯაშმა განაცხადა, საკომიტეტო მოსმენაზე მინისტრთან ზუგდიდის სკოლის დირექტორის გარდაცვალების საქმეზე ისაუბრებენ. მისი თქმით, უმცირესობის ფრაქციამ მიხეილ ბატიაშვილს წერილით მიმართა, რომ ზუგდიდის სკოლის დირექტორის საქმე სწორედ საკომიტეტო მოსმენაზე დეტალურად განხილულიყო.
„პლენარულ სესიაზე მიხეილ ბატიაშვილი 2018 წლის საქმიანობას შეაჯამებს, რომელიც შეეხება მიმდინარე და დაანონსებულ ცვლილებებს. პლენარული სხდომის შემდეგომ ჩვენ გვექნება საკომიტეტო მოსმენა. მოგეხსენებათ, რომ უმცირესობის ფრაქციის მხრიდან გაიგზავნა წერილი და მინისტრს ეთხოვა, საკომიტეტო მოსმენაზე დეტალური ანგარიშის წარდგენა ზუგდიდის სკოლის თემასთან დაკავშირებით. აღნიშნულ საკითხზე დეტალურად ვისაუბრებთ სწორედ პლენარული სხდომის შემდგომ“, – განაცხადა მარიამ ჯაშმა.
განათლების, მეცნიერების, კულტურისა და სპორტის მინისტრი თავის საქმიანობის ანგარიშს წარადგენს და დაგეგმილ რეფორმებზე ისაუბრებს, რის შემდეგაც დეპუტატების კითხვებს უპასუხებს. ამის შემდეგ გაიმართება საკომიტეტო მოსმენა, სადაც ზუგდიდის მეექვსე სკოლის დირექტორის საქმეზე ისაუბრებენ. აღნიშნულ საკითხზე კომიტეტში ბატიაშვილი ფრაქცია „ევროპულმა საქართველომ“ დაიბარა.