ირანელი რეპერი ამირ თაათალუ, დღეს ანტიირანული საპროტესტო აქციის სამიზნე გახდა, „ქართული მარშის,“ „მართლმადიდებელ მშობელთა კავშირისა“ და „პრიმაკოვის ქართულ-რუსული ცენტრის“ წარმომადგენლები დღეს გამართულ საპროტესტო აქციაზე აცხადებდნენ, რომ ირანის მოქალაქემ მასპინძელ ქვეყანას შეურაცხყოფა საჯაროდ მიაყენა და ის საქართველოდან უნდა გააძევონ. მიზეზი კი სოციალურ ქსელში გავრცელებული კონცერტის ფრაგმენტი გახდა, რომელსაც ქართული სუბტიტრები ქონდა, რომლის მიხედვითაც ის ქართველ ხალხს უხამსი სიტყვებით მოიხსენიებს.
კურიერთან საუბრისას ამირ თაათალუმ განაცხადა, რომ ქართველების შეურაცხმყოფელი ფრაზები არასოდეს უთქვამს და ფილარმონიის სცენიდან შეურაცხყოფაც არავისთვის მიუყენებია. არ იცის, ვინ დგას ამის უკან, თუმცა ირანელი მუსიკოსი არ გამორიცხავს, რომ ეს განზრახ დადგმული პროვოკაცია იყოს.
„მე შეურაცხყოფა არავისთვის მიმიყენებია, აღვნიშნე, რომ საქართველოში მოწევა დაშვებულია ჩემი ქვეყნისგან განსხვავებით და ეს როგორც პოზიტიური ფაქტი ისე ვახსენე. მგონი უბრალოდ გაუგებრობა მოხდა და არასწორი ინფორმაცია გაავრცელეს. თუ ბოდიშის მოხდას მაინც ითხოვთ ჩემგან, რამდენჯერაც საჭირო იქნება იმდენჯერ მოვიხდი, ეს სირცხვილი არაა, საქართველოს მე ძალიან დიდ პატივს ვცემ.“- განაცხადა მუსიკოსმა.