ილია ჭავჭავაძე რომ აქ იყოს, გეტყოდათ, რატიანი, გადი გარეთო, – ასე მიმართა დეპუტატმა ნუკრი ქანთარიამ „ევროპული საქართველოს“ დეპუტატ სერგო რატიანს განათლების კომიტეტის სხდომაზე.
როგორც ნუკრი ქანთარიამ აღნიშნა, სიტყვა ლიბერალური ნიშნავს თავისუფლებას, რაც კანონში ისედაც წერია.
„მინდა, კიდევ ერთხელ განვმარტო, თუ ლიბერალურს პირდაპირ ვთარგმნით ლათინურიდან, ის თავისუფლებას ნიშნავს. თავისუფლება ისედაც წერია, წერია თავისუფალი აზროვნების ჩამოყალიბება, თუმცა სამწუხაროდ, უკვე დღეს ლიბერალიზმი ეს არის კონკრეტული პოლიტიკური მიმართულება. მან მიიღო უამრავი განშტოება – ნეო ლიბერალიზმი; კონსერვატორული, სოციალური, კლასიკური ლიბერალიზმი. ეს დღეს აღარ არის აზროვნების თავისუფლება, ეს არის ინსტინქტების თავისუფლება, „რაც მე მინდა“, „რაც მე მსურს“ უკონტროლობის ხასიათი მიიღო. ეს უკვე არის პოლიტიკური ფილოსოფია“, – განაცხადა ქანთარიამ.
კანონპროექტის ინიციატორის დეპუტატმა სერგო რატიანმა მიმართა და აღნიშნა: „თქვენ ახლა ჩვეულებრივი მეცხრამეტე საუკუნის რეტროგრადული, რუსული ნარატივი შემოგაქვთ აი აქ. პირდაპირ ილია ჭავჭავაძე ამოიღეთ სწავლებიდან აი ეგ არის აი ზუსტად“.
„გმადლობთ ბატონო სერგო, დაიხვეწეთ დემაგოგიაში საკმაოდ. ილია რომ აქ იყოს, გეტყოდათ, რატიანი, გადი გარეთო“, – მიმართა სერგო რატიანს ნუკრი ქანთარიამ.