ბარსელონაში გუშინ ჩატარებულ სპეცოპერაციას საქართველოს კიდევ ერთი მოქალაქე იხსენებს. ის საქართველოს დატოვების მიზეზზეც საუბრობს.
“შეუნგრიეს კედლები, კარები. იარაღებით იყვნენ და საშინელი მდგომარეობა იყო. როცა აქ ბავშვები და ქალებიც ცხოვრობენ, ვფიქრობ, ეს არ უნდა მომხდარიყო. ცოტა სხვა ზომებისთვის უნდა მიემართათ. აქ ყოფნა საქართველოში ყოფნას, რა თქმა უნდა, არ გვირჩევნია. უბრალოდ, იქ არ არის სტაბილური სამსახური, რომ ოჯახი ვარჩინოთ. აქ მე ოჯახით ვარ, ჩემი მეუღლე და ბავშვი არიან, თორემ საქართველოში რომ იყოს სამსახური, შემოსავალი რომ გვქონდეს, მე აქ ნამდვილად არ გავჩერდებოდი”, – აცხადებს მოქალაქე “კურიერთან” საუბრისას.
მისი თქმით, არც გუშინ და არც დღეს მათ საქართველოს საკონსულოდან არავინ დაკავშირებია. შეგახსენებთ, რომ სპეცოპერაცია ესპანეთის შინაგან საქმეთა სამინიტროს თანამშრომლებმა ბარსელონას სკოლის მიტოვებულ შენობაში გუშინ ჩაატარეს.
აღნიშნულ ტერიტორიაზე ქართველი ემიგრანტები მას შემდეგ შესახლდნენ, რაც ესპანეთმა მათ თავშესაფარზე უარი უთხრა და ქუჩაში დარჩნენ. სპეცოპერაციისას 11 ქართველი დააკავეს. დაკავებულებს გამოძიება ბინის ქურდობასა და ორგანიზებულ დანაშაულში მონაწილეობას ედავება.