გიორგი ქობულია – ჩვენ ვცხოვრობთ თანამედროვე დემოკრატიულ ქვეყანაში და არასდროს უნდა დავივიწყოთ, რომ ეს 9 აპრილს დაღუპულთა გმირობის შედეგია

„9 აპრილი საქართველოს ისტორიაში ერთ-ერთი უმნიშვნელოვანესი დღეა. ჩვენ დღეს უნდა გავიხსენოთ და პატივი მივაგოთ იმ ადამიანების ხსოვნას, რომლებმაც საქართველოს თავისუფლების იდეა სიცოცხლის ფასად დაიცვეს და ეს იდეა რეალობად იქცა 2 წელიწადში”, – ამის შესახებ ეკონომიკისა და მდგრადი განვითარების მინისტრმა, გიორგი ქობულიამ რუსთაველის გამზირზე 9 აპრილს დაღუპულთა მემორიალთან განაცხადა, სადაც მინისტრმა და მისმა მოადგილეებმა 9 აპრილს დაღუპულთა ხსოვნას პატივი მიაგეს.
გიორგი ქობულიას განცხადებით, ჩვენ ვცხოვრობთ თანამედროვე დემოკრატიულ ქვეყანაში და ჩვენ არასდროს უნდა დავივიწყოთ, რომ ეს, დიდწილად, 1989 წლის 9 აპრილს დაღუპულთა გმირობის შედეგია, რომლებმაც ქვეყნის დამოუკიდებლობის იდეას სიცოცხლე შესწირეს.
1989 წლის 9 აპრილის მოვლენებიდან 30 წელი გავიდა, როდესაც საქართველოს დამოუკიდებლობის მოთხოვნით მოწყობილი მშვიდობიანი დემონსტრაცია საბჭოთა კავშირის შეიარაღებული ძალების ნაწილებმა დაარბიეს, რომელიც მშვიდობიან მოქალაქეთა მსხვერპლით დასრულდა.