სააკაშვილმა ერთხელ აქ კაიმაღი და სირცხვილი ერთად ჭამა და დარწმუნებული ვარ, მას კაცურ პასუხს გავცემთ, ისე, როგორც ხულოსა და ხულოელებს ეკადრებათ, – ასე გამოეხმაურა აჭარის მთავრობის თავმჯდომარე თორნიკე რიჟვაძე ექსპრეზიდენტ მიხეილ სააკაშვილის განცხადებას, რომელმაც ხულოს მაჟორიტარ დეპუტატს, რომელიც ორჯერ „ნაციონალური მოძრაობის“ სახელით იყო არჩეული პარლამენტში, „დეგრადირებული“ და „სუნიანი“ უწოდა.
სააკაშვილის განცხადებას თორნიკე რიჟვაძე ხულოს სამხატვრო გალერეიდან გამოეხმაურა.
„დღეს მაინც ვერ ვმალავ განაწყენებას, რამდენიმე საათის წინ სამარცხვინო პოლიტიკური ძალის სამარცხვინო ლიდერი სააკაშვილი გამოვიდა და განაცხადა, რა კავშირშია ერთმანეთთან ხულო და სამხატვრო გალერეაო. თქვენ ხედავთ, რამდენი ნახატია გამოფენილი. ჩვენთან არის ახლა ძალიან სახელოვანი ფერმწერის, ბატონი სიმონ ართმელაძის შვილი და ესეც ბევრ რამეზე მეტყველებს.
ეს არის სამარცხვინო, ეს არის მართლა ფარჩაკი. ჯერ იყო და ამ პარტიის წარმომადგენელმა ქიქავამ აჭარლებს მოგვაყენა ყველას შეურაცხყოფა, ახლა გამოვიდა ეს მართლა შარლატანების ბელადი და აცხადებს, რომ ხულოში კულტურას და ზოგადად, სამხატვრო გალერეას არაფერი ესაქმება. თუმცა, დარწმუნებული ვარ, რომ ჩვენ მათ გავცემთ ადეკვატურ პასუხს 19 რიცხვში. მან ერთხელ აქ კაიმაღი და სირცხვილი ერთად ჭამა და დარწმუნებული ვარ, მას კაცურ პასუხს გავცემთ, ისე, როგორც ხულოსა და ხულოელებს ეკადრებათ“, – განაცხადა თორნიკე რიჟვაძემ.