“ნაციონალური მოძრაობის” გაერთიანებული ოპოზიციის მერობის კანდიდატმა ზუგდიდში სანდრა რულოვსმა თქვა, რომ ზუგდიდის 67-ე საოლქო საარჩევნო კომისიის თავმჯდომარე უნდა გადადგეს, რადგან ამ ოლქში დარღვევას ჰქონდა ადგილი. ამის შესახებ რულოვსმა საქართველოში მოქმედი საელჩოების წარმომადგენლებთან შეხვედრამდე თქვა.
სანდრა რულოვსის თქმით, საქართველოში ჯერ პრაქტიკაში არ ყოფილა, რომ სამაგიდო სიები საუბნო კომისიებისთვის არჩევნებამდე 5 დღით ადრე გადაეცათ. “იქ არის პირადი ინფორმაცია, ჩვენი ამომრჩევლების სურათები, მარტო ჩვენი კი არა, მთელი ზუგდიდის ამომრჩევლების. დარწმუნებული ვარ, ჩვენს ამომრჩევლებზე იქნება დიდი ზეწოლა”, – თქვა რულოვსმა.
სანდრა რულოვსი დიპლომატიურ კორპუსს რეაგირებას სთხოვს, “რათა არ მოხდეს საპრეზიდენტო არჩევნების მეორე ტურის გამეორება, უხეში მოსყიდვები, გაყალბება და ზეწოლა”.
შეხვედრაზე “ნაციონალური მოძრაობის” გაერთიანებული ოპოზიციის წარმომადგენლები და სანდრა რულოვსი დიპლომატებს ზუგდიდში გუშინ მომხდარი ფაქტის კადრებს აჩვენებენ.
14 მაისს, გვიან ღამე ზუგდიდის #67 საოლქო საარჩევნო კომისიის შენობაში გაერთიანებული ოპოზიციის წარმომადგენლები იყვნენ მისულები. ისინი ამბობდნენ, რომ ზუგდიდის სოფლებში სამაგიდო სიები არჩევნებიდან ხუთი დღით ადრე გაატანეს, რაც მათი თქმით, კანონდარღვევაა და არჩევნების გაყალბების მცდელობას წარმოადგენს.
67-ე საოლქო საარჩევნო კომისიის თავმჯდომარე მირანდა მესხი კი ამტკიცებდა, რომ მათ კანონი არ დაურღვევიათ და ყველა პროცედურა კანონის დაცვით მიმდინარეობს. ამის შესახებ განცხადება ცესკომაც გააკეთა.
14 მაისს ზუგდიდში, დადიანების სასახლის ეზოში ფიზიკური დაპირისპირება მოხდა, რომლის კადრებიც Facebook-ზე სანდრა რულოვსმა გავრცელა. ამის შემდეგ ზუგდიდის საკრებულოში გაერთიანებული ოპოზიციის წარმომადგენლები და უმრავლესობის დეპუტატები ერთმანეთს სიტყვიერად და ფიზიკურად დაუპირისპირდნენ. სხდომაზე სანდრა რულოვსი და „ენმ“-ს წარმომადგენლები მივიდნენ და დეპუტატებისგან ზუგდიდში, დადიანების სასახლის ეზოსა და სოფელ ჯიხაშკარში მომხდარი ინციდენტების განხილვა მოითხოვეს.
უმრავლესობის წევრმა ირაკლი ლაგვილავამ სანდრა რულოვსს უთხრა, რომ მას არ აქვს მორალური უფლება, ზვიად გამსახურდიას დარბაზში ხმამაღლა ისაუბროს. სწორედ ლაგვილავას სიტყვით გამოსვლას მოჰყვა ხმაური და დაპირისპირება. მოგვიანებით, დადიანების სასახლის ეზოში მომხდარ ინციდენტში მონაწილე გელა კვარაცხელია დააკავეს.
საქართველოში შუალედური არჩევნები 19 მაისს გაიმართება.