“უკრაინიდან ექსპრეზიდენტ მიხეილ სააკაშვილის ექსტრადირების მოთხოვნა ძალაშია”

„უკრაინიდან ექსპრეზიდენტ მიხეილ სააკაშვილის ექსტრადირების მოთხოვნა ძალაშია“ – ამის შესახებ საქართველოს გენერალურ პროკურატურაში განუცხადეს.
უწყების პრესსამსახურში განმარტავენ, რომ მიხეილ სააკაშვილის ექსტრადირების საკითხთან დაკავშირებით პროკურატურა კანონით გათვალისწინებული ნორმებით იმოქმედებს.
შეგახსენებთ, რომ საქართველოს გენერალურმა პროკურატურამ, 2017 წლის 1 სექტემბერს უკრაინის იუსტიციის სამინისტროსა და გენერალურ პროკურატურას მიხეილ სააკაშვილის დაკავებისა და ექსტრადიციის შესახებ შუამდგომლობით კიდევ ერთხელ მიმართა.
პროკურატურის ინფორმაციით, „მაშინ, როდესაც ძებნილი პირის მიმართ მიმდინარე სისხლის სამართლის საქმე იმყოფება გამოძიების სტადიაზე, უკრაინული კანონმდებლობის თანახმად ექსტრადიციის საკითხის განმხილველი ორგანოა უკრაინის გენერალური პროკურატურა, ხოლო როდესაც ძებნილი პირის მიმართ არსებული სისხლის სამართლის საქმე იმყოფება სასამართლო განხილვის ეტაპზე, ექსტრადიციის საკითხს განიხილავს იუსტიციის სამინისტრო. აღნიშნულიდან გამომდინარე, რადგან მიხეილ სააკაშვილის მიმართ არსებული ბრალდების ყველა საქმე იმყოფება სასამართლო განხილვის სტადიაზე, საქართველოს მთავარმა პროკურატურამ მისი დაკავებისა და ექსტრადიციის შუამდგომლობა გააგზავნა უკრაინის იუსტიციის სამინისტროში“ – ნათქვამია პროკურატურის მიერ გავრცელებულ ინფორმაციაში.