უკრაინის გენერალური პროკურორის იური ლუცენკოს განცხადებით, უკრაინის პრეზიდენტის ვოლოდიმირ ზელენსკის წინადადება ე.წ. დონეცკისა და ლუგანსკის სახალხო რესპუბლიკების წინააღმდეგ დაწესებული ეკონომიკური ბლოკადის მოხსნის შესახებ „ტერორიზმის დაფინანსების შესახებ“ უკრაინის სისხლის სამართლის კოდექსის მუხლს დაარღვევს. ამის შესახებ უკრაინული მედია წერს.
ლუცენკოს თქმით, კიევის მხრიდან ასეთი ნაბიჯის გადადგმა მხოლოდ მაშინ იქნება შესაძლებელი, რაც ოკუპირებულ რეგიონებში მოქმედი საწარმოები უკრაინულ სახელმწიფო უწყებებში გადასახადების გადამხდელებად დარეგისტრირდებიან.
მისივე განცხადებით, ახლა ეკონომიკური ბლოკადის მოხსნა „ტერორისტული გაერთიანებების მიერ გადასახადების გადახდის ლეგალიზების ტოლფასი იქნება“.
ეკონომიკური ბლოკადის მოხსნის წინადადებით 5 ივნისს უკრაინის მეორე პრეზიდენტი ლეონიდ კუჩმა გამოვიდა, რომელიც ზელენსკიმ კონფლიქტის დარეგულირების სამმხრივ საკონტაქტო ჯგუფში კიევის წარმომადგენლად დანიშნა.
ზელენსკის ეს ნაბიჯი მისმა წინამორბედმა პეტრო პოროშენკომაც გააკრიტიკა. მისი განცხადებით, ეკონომიკური ბლოკადის მოხსნა ეროვნული ინტერესების ღალატს ნიშნავს, ვინაიდან ასეთი ნაბიჯი „რუსული სცენარის“ რეალიზებას უწყობს ხელს.
უკრაინის აღმოსავლეთ ნაწილში მიმდინარე კონფლიქტის შესახებ შეგიძლიათ წაიკითხოთ ბმულზე.