ღირსეული ნაბიჯია, დიდი მადლობა კეთილი იდეისთვის – ნინო ქათამაძე ორანჟერეის პროექტზე

“ღირსეული ნაბიჯია. ბუნებასთან სიახლოვე ხომ საერთოდ საოცნებო გახდა.” – ასე ეხმაურება მომღერალი ნინო ქათამაძე დიღმის ტყე-პარკის მიმდებარედ მრავალფუნქციური ორანჟერეის მოწყობის იდეას.
შესაბამისი “პოსტი” მომღერალმა ორანჟერის “ფეისბუქგვერდზე” გამოაქვეყნა.
“წარმატებებს გისურვებთ. დიდი მადლობა კეთილი იდეისთვის.”- აღნიშნავს ნინო ქათამაძე.
შეგახსენებთ, რომ აღმაშენებლის ხეივნის მიმდებარედ, დიღმის ტყე-პარკთან მდებარე  ავტოსალონი, რომელიც, დანიშნულებიდან გამომდინარე, გარემოს ეკოლოგიურ ზიანს აყენებს და მოსახლეობას ტერიტორიით სარგებლობის საშუალებას არ აძლევს, მრავალფუნქციური, საგამოფენო ორანჟერეით უნდა ჩანაცვლდეს. პროექტი 2018 წლის სექტემბერში დამტკიცდა. პროექტის თანახმად, ავტომომსახურების ცენტრის დემონტაჟი მოხდება და მის ადგილას განთავსდება შენობა, რომლის ინტერიერი და ექსტერიერი ერთი მთლიანი ლანდშაფტური ზონა გახდება.
პროექტის განხორციელება არცერთი ხის მოჭრას არ გულისხმობს. მეტიც, აღნიშნულ ტერიტორიაზე დაირგვება 150-მდე ახალი, მათ შორის, ეგზოტიკური მცენარეები, რომლებიც დიღმის ტყე-პარკში არ გვხვდება.
საერთო სარგებლობის ორანჟერეა მულტიფუნქციური იქნება და რეკრეაციული კომპონენტის პარალელურად, გასართობ-დასასვენებელ სივრცეებსაც მოიცავს. მოსახლეობა აქ ნებისმიერ ამინდში შეძლებს, ისეირნოს, დაისვენოს, გაერთოს და დაესწროს სხვადასხვა თეატრალურ წარმოდგენას.
პროექტის ფარგლებში, უნდა დამონტაჟდეს სარწყავი სისტემა, შენობა კი მინით გადაიხურება, რათა მცენარეებამდე მზის სხივებმა მიაღწიოს. ტერიტორიაზე გაკეთდება შადრევანი, ქვაფენილიანი ქუჩა და მოეწყობა ახალი რეკრეაციული სივრცე, ასევე ის ძველი თბილისის არქიტექტურისთვის დამახასიათებელი დეტალებით გაფორმდება.
პროექტის მიზანი ეკოლოგიური და საპარკე ინფრასტრუქტურის ერთმანეთთან ორგანულად შერწყმაა.