ზოგადი უნარების გამოცდის შედეგები ცნობილია

ერთიან ეროვნულ გამოცდებზე ჩაბარებული ზოგადი უნარების პასუხები გამოქვეყნდა.
როგორც გამოცდების ეროვნულ ცენტრში აცხადებენ, სისტემაში შესასვლელად აპლიკანტმა შესაბამის ველში უნდა მიუთითოს პირადი ნომერი და საიდენტიფიკაციო ნომერი. შედეგებთან ერთად იქნება განთავსებული აბიტურიენტის ნაშრომის ასლი და მიღებული ქულა.
შედეგების გაგებას აბიტურიენტები მოკლე ტექსტური შეტყობინებითაც შეძლებენ, ამისათვის აპლიკანტმა მობილური ტელეფონიდან (მაგთი, ჯეოსელი) საკუთარი საგამოცდო საიდენტიფიკაციო ნომერი უნდა გააგზავნოს ნომერზე 93333 (მომსახურების საფასური 0.50 ლარი ჩამოიჭრება ანგარიშიდან იმდენჯერ, რამდენჯერაც აბონენტი გააგზავნის შეტყობინებას).
ზოგადი უნარების გამოცდაში ზღვარი გადალახულად ითვლება, თუ აბიტურიენტმა მიიღო:
I ვარიანტი – 22 ქულა და მეტი;
II ვარიანტი – 24 ქულა და მეტი;
III ვარიანტი – 22 ქულა და მეტი;
IV ვარიანტი – 24 ქულა და მეტი.
“გამოცდა ზოგიერთ საგანში რამდენიმე სესიად მიმდინარეობს, რაც განაპირობებს საგამოცდო ტესტების სხვადასხვა ვარიანტის გამოყენების აუცილებლობას. შესაძლოა, კონკრეტული საგნის ტესტის სხვადასხვა ვარიანტი სირთულის თვალსაზრისით მცირედით განსხვავდებოდეს ერთმანეთისაგან, ამიტომ აბიტურიენტებისათვის თანაბარი საკონკურსო პირობების შესაქმნელად გამოიყენება ქულების გათანაბრება (ინფორმაცია გათანაბრების შესახებ).სააპელაციო განაცხადების მიღება დაიწყება ყველა გამოცდის შედეგის გამოქვეყნების შემდეგ. განაცხადები მიიღება ელექტრონულად ვებგვერდებზე: www.naec.ge; online.naec.ge”, -ნათქვამია ინფორმაციაში.
ამასთან, როგორც ირკვევა აბიტურიენტების 12,9% – მა უნარების გამოცდაში მინიმალური კომპეტენციის ზღვარი ვერ გადალახა.
„აბიტურენტების 12,9 % გამოეთიშა პროცესს, რადგან მათ ვერ გადალახეს მინიმალური კომპეტენციის ზღვარი. რაც შეეხება სხვა საგნის შედეგებს, ვეცდებით, რომ ამ და მომდევნო კვირაში დაიდოს ყველა საგნის შედეგი. მას შემდეგ, რაც ყველა საგანში გამოქვეყნდება შედეგები, დაიწყება აპელაციის პროცესი. ვადებსა და სხვა დეტალებზე ინფორმაცია დაიდება ჩვენს ვებ-გვერდზე,“ – განაცხადა გამოცდების ეროვნული ცენტრის ხელმძღვანელმა სოფო გორგოძემ.