საქართველომ დააკმაყოფილა მოსკოვის მოთხოვნა და რუსეთს გადასცა იაროსლავ სუმბაევი, რომელსაც რუსეთში კიბერთაღლითობასთან, დანაშაულებრივი დაჯგუფების მეთაურობასა და გამომძიებლის მკვლელობასთან აკავშირებენ.
წითელი ცერკულარით ძებნილი სუმბაევი ლარსის სასაზღვრო გამშვები პუნქტიდან 24 ოქტომბერს გაიყვანეს და რუსეთის სამართალდამცველებს გადასცეს.
„მე მაქვს სტრასბურგის სასამართლოს წერილი და საბოლოო პასუხი – სტრასბურგის სასამართლო უარს ამბობს ამ ექსტრადირების შეჩერებაზე. ეს წერილი თარიღდება 6 სექტემბრით და მას შემდეგ, რაც ეს წერილი დაცვის მხარეს ჩაბარდა (ის გამოგზავნილია სოსო ბარათაშვილის სახელზე), წერია, რომ ექსტრადიციის მასალებს, მიმართვას გაეცნენ და სტრასბურგის სასამართლო არ თვლის, რომ სუმბაევი შეიძლება დაექვემდებაროს რაიმე ტიპის არაადამიანურ მოპყრობას. იუსტიციის მინისტრის 30 სექტემბრის ბრძანებაშიც ზუსტად იგივე წერია. შესაბამისად, ძალიან დასანანია, რომ ექსტრადიციაში მყოფ პატიმარს, შეიძლება მისთვისაც კი არ არის ეს წერილი ცნობილი, არ აუხსნეს, რომ სტრასბურგში მისი საჩივარი ექსტრადიციის შეჩერების შესახებ მარცხით დასრულდა.
მინდა მოვუწოდო ყველა ადვოკატს, ვინც საექსტრადიციო პატიმრობაში მყოფ უცხოელს იცავს, რომ თავი შეიკავონ უსაფუძვლო აურზაურისგან და ყველამ იცოდეს, რომ რომელი ქვეყნის მოქალაქეც არ უნდა იყოს, მათ შორის რუსეთის, პოტენციური დამნაშავე, საქართველო არ არის დამნაშავეების თავშესაფარი. საქართველო თავშესაფარი შეიძლება იყოს მათთვის, ვისაც თავშესაფარი ნამდვილად ეკუთვნის. მაგრამ ეს ვერ იქნება ოაზისი, იმისთვის რომ თავი დააღწიო საკუთარი ქვეყნის მართლმსაჯულებას, – განაცხადა იუსტიციის მინისტრმა თეა წულუკიანმა.
სუმბაევის რუსეთისთვის გადაცემას საქართველო მიმდინარე წლის მაისში აპირებდა, თუმცა მაშინ ექსტრადიციის პროცესი დროებით საქართველოს უზენაესმა სასამართლომ შეაჩერა.
ასტრახანის მკვიდრი იაროსლავ სუმბაევი ქართველმა სამართალდამცავებმა 2018 წლის 5 ნოემბერს თბილისში ცეცხლსასროლი იარაღის უკანონოდ შეძენისა და ყალბი პასპორტის გამოყენების ბრალდებით დააკავეს. რუსეთის გენერალურმა პროკურატურამ ქართულ მხარეს სუმბაევის გადაცემის მოთხოვნით 26 ნოემბერს მიმართა.
სუმბაევს რუსეთში ჰაკერობასა და თაღლითობაში ადანაშაულებენ, რითაც მან ტუროპერატორებს მატერიალური ზარალი მიაყენა. საქმეს ვიცეპოლკოვნიკი ევგენია შიშკინა იძიებდა, რომელიც მოსკოვში გასული წლის 10 ოქტომბერს მოკლეს. გამოძიება არ გამორიცხავს, რომ სუმბაევი მკვლელობასთანაც იყოს დაკავშირებული.
რუსეთის პროკურატურის ინფორმაციით, თაღლითურ სქემაში, რომელიც ე.წ. ბილეთების საქმის სახელითაა ცნობილი, სულ 29 ადამიანი იყო ჩართული.