ვანო ნადირაძეს არ აქვს ინფორმაცია, კონკრეტულად რა საქმეზე იყვნენ დაკავებული ის პირები, რომლებიც სოციალურ ქსელში, საკუთარ სტატუსში მოიხსენია.
ვანო ნადირაძე უკრაინაში მებრძოლი ქართველია, რომელმაც გუშინ თავისი სოციალური ქსელში შემდეგი შინაარსის სტატუსი დაწერა: „საქართველოში დაიჭირეს წუხელ ის ადამიანები ვინც უკრაინაში მებრძოლებს გვედგნენ გვერდში ირაკლი ბაგიშვილი და ზებო.“
დღეს მისი სტატუსი კონფლიქტოლოგმა მამუკა არეშიძემ სახელმწიფო უსაფრთხოების სამსახურის მიერ ტერორიზმის ბრალდებით დაკავებულ პირებს დაუკავშირა.
2030.news ვანო ნადირაძეს დაუკავშირდა. კითხვაზე, თუ საიდან იცნობს ბაგიშვილს და ზებოს, განაცხადა, რომ ისინი სოციალური ქსელის მეშვეობით დაუკავშირდნენ და უკრაინაში მებრძოლი ქართველების ამბებს ეკითხებოდნენ.
მისივე თქმით, ბაგიშვილმა და ზებომ საქართველოს ეროვნული დროშა უკრაინაში მებრძოლებს ორჯერ გაუგზავნეს.
„ალბათ, მთლად არ ვარ საქმის კურსში. მე ომში ვარ. უბრალოდ, როგორც გავიგე, უკრაინელი მეომრების სახელს სვრიან. არჩევნები მოდის და ჩვენი სახელის გასვრა უნდათ, რადგან სააკაშვილი აქ არის უკრაინაში”, – განაცხადა ნადირაძემ კითხვაზე ნამდვილად არიან თუ არა სუს-ის მიერ დღეს დაკავებული პირები ზებო (ვლადიმერ რუხაძე) და ბაგიშვილი.
სახელმწიფო უსაფრთხოების სამსახურის კონტრდაზვერვის დეპარტამენტმა 2016 წლის 20 აგვისტოს, რამდენიმეთვიანი მუშაობის შედეგად, ტერორისტული აქტის ჯგუფურად მომზადებისათვის და ტერორისტული მიზნით, ცეცხლსასროლი იარაღის, საბრძოლო მასალისა და ფეთქებადი ნივთიერებების მართლსაწინააღმდეგო შეძენა-შენახვა, ტარებისა და ამავე დანაშაულის ჩადენაში დახმარების ფაქტზე, საქართველოს ხუთი მოქალაქე: ბექა ბ, ვლადიმერ რ, მინდია ვ, ჯაბა მ. და ნური ჭ. დააკავა.
როგორც სუს-ში გამართულ ბრიფინგზე ითქვა, ამ პირების გარდა, სამსახურებრივი უფლებამოსილების გადამეტების ფაქტზე, შინაგან საქმეთა სამინისტროს გენერალურ ინსპექციასთან ერთობლივად, დაკავებულია საპატრულო პოლიციის მოქმედი თანამშრომელი ლევან მ, დანაშაულის შეუტყობინებლობის ფაქტზე – საქართველოს ერთი მოქალაქე ირაკლი ბ.
გამოძიების ინფორმაციით, დასახელებული პირები ამზადებდნენ სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქებას.
www.2030news