ალეკო ელისაშვილის ასეთი აქტიურობა 2012 წლამდე არ მახსოვს, – ამის შესახებ ”ქართული ოცნების” აღმასრულებელმა მდივანმა ირაკლი კობახიძემ დღეს გამართულ პრესკონფერენციაზე განაცხადა, სადაც თბილისის მერიის ირგვლივ განვითარებულ მოვლენებს გამოეხმაურა.
კობახიძის თქმით, ზოგადად მერის მხრიდან გაკეთდა გარკვეული განცხადება, რაზეც ბოდიში მოიხადა, თუმცა პარტიის აღმასრულებელ მდივანს ნარმანიას გადადგომის მოთხოვნა არარელევანტურად მიაჩნია.
”მერის გადადგომის მოთხოვნა არარელევანტური და არაკორექტულია იმ პირების მხრიდან, რომლებიც წლების განმავლობაში ფუთავდნენ გიგი უგულავას მმართველობას. ამ კონკრეტული ადამიანების მხრიდან ამ მოთხოვნას ვერ მივიღებთ”, – განაცხადა ირაკლი კობახიძემ.
კითხვაზე, გულისხმობს თუ არა ამ პირებში ”პარტიზან მებაღე” ნატა ფერაძეს, კობახიძემ განაცხადა, რომ გულისხმობდა.
”ვინმეს თუ გახსოვთ მისი აქტიურობა ქალაქის გამწვანებასთან დაკავშირებით, 2012 წლამდე, მაშინ ყველაფერზე დაგეთანხმდებით, მე ასეთი აქტიურობა არ მახსოვს. ამის შემდეგ გაუჩნდა მას ენთუზიაზმი, რომ იბრძოლოს ქალაქის იერსახის შენარჩუნებისთვის და ქალაქის გამწვანებისთვის. იგივე შემიძლია გითხრათ ალეკო ელისაშვილზე, მისი ასეთი აქტიურობა 2012 წლამდე არ მახსოვს. გავიხსენოთ რა ხდებოდა სპორტის სასახლის მიმდებარე ტერიტორიაზე, გიგი უგულავას მმართველობის დროს მოხდა ქალაქის მთავარი იერსახის დამახინჯება. როცა განაშენიანდა სპორტის სასახლის უკან მდებარე ტერიტორია, მოიჭრა 20 ათასი ხე, თუმცა ეს არავინ იცოდა. ერთი ხეც მნიშვნელოვანია ქალაქისთვის, მაგრამ ამ კონკრეტულ შემთხვევაში, თუკი არ მეცოდინება დეტალები, შეფასებას ვერ გავაკეთებ, თბილისის მერიამ მაქსიმალური უნდა გააკეთოს იმისთვის, რომ ქალაქის ინტერესები იყოს დაცული”, – აღნიშნა კობახიძემ.
პარტიის აღმასრულებელი მდივნის განმარტებით, მერიის ირგვლივ მიმდინარე მოვლენებზე მსჯელობა იყო.