“ე.წ დეპუტატები ლევან ხაბეიშვილს ტურებივით დაესხნენ თავს” – ეს განცხადება “ნაციონალური მოძრაობის” თავმჯდომარე გრიგოლ ვაშაძემ, ლევან ხაბეიშვილზე თავდასხმის ფაქტის შეფასებისას ქუთაისში გააკეთა.
“დღეს, ე. წ. დეპუტატები ჯგუფურად გაუსწორდნენ ხაბეიშვილს და უმოწყალოდ სცემეს. შემდეგ კი განცხადებებიც გააკეთეს, რომ ხაბეიშვილმა ის მიიღო, რაც ეკუთვნოდა. კიდევ ერთხელ დაინახა ყველამ, რომ ამ ე.წ. “ქართული ოცნების” ხელისუფლებაში გაჩერება არ შეიძლება. რატომ დაესხნენ თავს ლევან ხაბეიშვილს? იმიტომ რომ, ეს ადამიანი ფაქტებით და ციფრებით ამხელს ყველას. არ მოგწონთ ლევან ხაბეიშვილის მოძიებული ციფრები და ფაქტები? მოკიდეთ მის განცხადებებს ხელი და მიბრძანდით სასამართლოში. მითუმეტეს რომ სასამართლო თქვენს ხელშია და კანონის ენით დაელაპარაკეთ და მოსთხოვეთ პასუხები”,- განაცხადა გრიგოლ ვაშაძემ.
ცნობისათვის, დღეს თბილისის საკრებულოში სპორტის, განათლებისა და სარევიზიო კომისიის გაერთიანებულ სხდომაზე ხმაური იყო. სიტყვიერი კამათი ფიზიკურ დაპირისპირებაში გადაიზარდა, რის შედეგადაც “ნაციონალური მოძრაობის“ წევრს ლევან ხაბეიშვილს ფიზიკურად გაუსწორდნენ.