ხელვაჩაურის სასამართლოს გადაწყვეტილებით, თბილისის საქალაქო სასამართლოს თავმჯდომარის ფიზიკური შეურაცხყოფისა და მუქარის ბრალდებით ერთ-ერთ ბრალდებულს, ასოციაცია „მომავლის იმედის“ თავმჯდომარე თამარ ხაჭაპურიძეს აღკვეთის ღონისძიების სახით, პატიმრობა შეეფარდა. მეორე დაკავებულს – მის მეუღლე კახაბერ ხაჩიძეს 30 ათასი ლარის ოდენობის გირაოს გადახდა დაეკისრა. ამის შესახებ ინფორმაციას აჭარის ტელევიზია ავრცელებს.
საქმე 26 აგვისტოს, გონიოს სანაპიროზე მომხდარ ინციდენტს ეხება.
ხაჭაპურიძე და ხაჩიძე ყვებიან, რომ მოხდა კონფლიქტი, რა დროსაც, მათ არასრულწლოვან შვილს ფიზიკური შეურაცხყოფა მიაყენეს. პოლიცია თავად ხაჭაპურიძის გამოძახების საფუძველზე გამოცხადდა შემთხვევის ადგილზე. მოგვიანებით კი, მოვლენები მათ საწინააღმდეგოდ განვითარდა.
დაკავებულ ხაჭაპურიძეს ეჭვი აქვს, რომ პროცესები მის საქმიანობას უკავშირდება – კერძოდ, ჩვილების საქმეს და მისი გაჩუმება სურთ.