ავთანდილ (ზურა) ჩხაიძემ -საქართველოს პარლამენტის მაჟორიტარი დეპუტატობის კანდიდატმა ოზურგეთში ბლოკიდან `ნინო ბურჯანაძე დემოკრატიული მოძრაობა”, არჩევნებამდე 40 დღით ადრე ახალი პირადი მობილური ტელეფონის ნომერი ჩართო მხოლოდ ამომრჩეველთათვის.
ამის შესახებ დეპუტატობის კანდიდატმა დღეს განაცხადა ადგილობრივ მედიასაშუალებათა ჟურნალისტებთან შეხვედრაზე:
“თქვენც მოგისმენიათ, ალბათ, ამომრჩეველთა მხრიდან ხშირად ისმის საყვედური, რომ აირჩევენ დეპუტატს და მერე ვეღარ პოულობენ მას. ჩემი, როგორც დეპუტატობის კანდიდატის, პროგრამულ მასალაში, რომელიც თითოეულ თქვენგანს დაგირიგდათ, ძევს სავიზიტო ბარათი. ასეთი ბარათი მიუვა ამომრჩეველთა აბსოლუტურ უმრავლესობას, მასში მითითებულია მობილური ტელეფონის ნომერი, რომელიც ჩაირთო დღეს და დღეიდან ეს პირადად ჩემი ტელეფონია მხოლოდ ამომრჩეველთათვის. ნებისმიერ ამომრჩეველს შეეძლება ამ ნომერზე დამიკავშირდეს ყოველგვარი შუამავლების, ბიუროების და მდივნების გარეშე”.
ავთანდილ (ზურა) ჩხაიძემ პრესკონფერენციის დაწყებისთანავე ხაზი გაუსვა იმას, რომ მომავალში ღია იქნება ჟურნალისტებთან მისი ურთიერთობა:
“იმედს გამოვთქვამ, რომ მომავალში ჩვენი ურთიერთობა აბსოლუტურად ღია იქნება, ჩათვალეთ, რომ დღისა და ღამის ნებისმიერ მომენტში მზად ვარ, ამომწურავი პასუხი გაქცეთ ყველა იმ შეკითხვაზე, რომელიც ჩემგან დაგაინტერესებთ”.
დეპუტატობის კანდიდატის თქმით, მან და თავისმა გუნდმა დღეიდან დაიწყეს წინასაარჩევნო კამპანიის მეორე, დამამთავრებელი ეტაპი:
“დღეს წინასაარჩევნო კამპანიის მეორე, დამამთავრებელ ფაზას ვიწყებთ, შეიძლება ითქვას, რომ ფინიშის სწორზე გავედით. ტექნიკურმა სამუშაოებმა საკმაოდ დიდი დრო, ძალა და ენერგია წაიღო. ჩვენი შტაბის სასახელოდ უნდა ითქვას, რომ ყველაფერ ამას კარგად გაართვა თავი. ახლა პრაქტიკულად ვიწყებთ იმ ეტაპს, რომელსაც ჰქვია საზოგადოებაში გასვლა. ისე არ გამიგოთ, თითქოს აქამდე მოსახლეობას არ შევხვედრივართ. შევხვდით და არაერთგზის, მაგრამ მომავალი შეხვედრები სხვა სტილისა და ხასიათის იქნება, წინასაარჩევნო კამპანიას რომ შეეფერება, ისეთი. უფრო ფართო მასებთან გვექნება შეხვედრა და არა მხოლოდ იმ ადამიანებთან, რომლებიც იდეურად ჩვენთან ახლოს დგანან, არამედ ყველასთან, ვინც ასე თუ ისე ინტერესდება იმ პოლიტიკით, რა პოლიტიკის გატარებასაც აპირებს ჩვენი პარტია, ჩვენი ბლოკი”.
ავთანდილ (ზურა) ჩხაიძემ მოკლე თეზისებად წარმოგვიდგინა `ნინო ბურჯანაძე დემოკრატიული მოძრაობის” ვრცელი საარჩევნო პროგრამა. უპირველესად ყურადღება გაამახვილა ოფშორულ ზონებში დარეგისტრირებული იურიდიული პირებისათვის საქართველოში ქონების ფლობის აკრძალვაზე:
“ჩვენ ვგეგმავთ, ხელისუფლების მოსვლის შემთხვევაში, საკანონდებლო დონეზე ავკრძალოთ ოფშორულ ზონებში დარეგისტრირებული იურიდიული პირების საქართველოში ქონების ფლობა. თქვენთვის ცნობილია, რას ნიშნავს ეს. ისიც ცნობილია, რომ ბევრი კითხვითი ნიშანი ჩნდება იმ ადამიანების მიმართ, ვინც სერიოზულ ქონებასა და ფულად რესურსებს ფლობენ და ამ რესურსებით გარკვეულ პოლიტიკურ ამინდს ქმნიან ქვეყანაში. მათი უმრავლესობის ფირმები დარეგისტრირებულია ოფშორულ ზონებში, ანგარიშებიც იქ არის გახსნილი და პრაქტიკულად საზოგადოებისთვის აბსოლუტურად დახურულია, რა რესურსებს ფლობენ ისინი, საიდან არის ეს, რამდენად სამართლებრივად სწორად არის მოპოვებული და ა. შ.”
დეპუტატობის კანდიდატმა ყურადღება გაამახვილა განათლების სისტემაში, შექმნილ საგანგაშო სიტუაციაზე, განსაკუთრებით უმაღლეს სასწავლებლებში:
“არ ვიცი რამდენი ასეული უმაღლესი სასწავლებელი ფუნქციონირებს საქართველოში, მაგრამ ვიცი, რა დონეზეა უმაღლესი განათლება. საქართველოს უმაღლეს სასწავლებლებში დღეს ათიათასობით სტუდენტია, რომლებიც სერიოზულ, სოლიდურ ფულს იხდიან სწავლის საფასურად ათასნაირი კრედიტებით, პროცენტიანი სესხებით, მიღებული განათლება კი ბოლოვდება იმით, რომ იღებენ მუყაოს დიპლომებს, რომელიც არათუ საზღვარგარეთის რომელიმე ქვეყანაში, არამედ საქართველოშიც არსად გამოდგება. ამიტომ, მიმაჩნია, რომ ეს სისტემა აბსოლუტურად, ფუნდამენტურად შესაცვლელია. პირდაპირ უნდა ვთქვათ, რომ ყვლეფენ ადამიანებს, სხვა არაფერი ხდება. პროგრამაში საუბარი გვაქვს განათლების სხვა საფეხურებზეც, პედაგოგთა ხელფასების ამაღლებაზე, ბაგა-ბაღების აღმზრდელებისთვის პედაგოგის სტატუსის აღდგენაზე”.
ავთანდილ (ზურა) ჩხაიძემ დადებითად შეაფასა ჯანდაცვაში გატარებული რეფორმები, თუმცა, ეჭვი გამოთქვა, რომ სახელმწიფო ბიუჯეტი კიდევ დიდხანს გაუძლებს ამ დატვირთვას:
“ჯანდაცვის სფეროში გატარებული რეფორმა ერთ-ერთი წარმატებულია. შემიძლია ვთქვა, რომ მართლა მრავალმა ადამიანმა იგრძნო ეს სიკეთე, მაგრამ ასე გაგრძელება, ალბათ, შეუძლებელი იქნება, მეეჭვება, რომ ეს შეძლოს სახელმწიფო ბიუჯეტმა. აქ აუცილებლად შესაცვლელია რაღაც. ვიცი, ამაზე ხელისუფლება ფიქრობს, მაგრამ ძალიან რთულია, სახელმწიფოსგან ამ თვალსაზრისით დახმარებასშეჩვეულ ადამიანს უთხრა, ვერ დაგაფინანსებ, ან ნაწილობრივ დაგაფინანსებო.
ვერავითარ კრიტიკას ვერ უძლებს თვითონ ჯანდაცვის მუშაკების ანაზღაურება, მიუხედავად იმისა, რომ შემოსავლები ჯანდაცვის სფეროში არსებობს, მედპერსონალის ანაზღაურება პრაქტიკულად არის ძალიან დაბალი”.
დეპუტატობის კანდიდატმა ყველაზე ვრცლად ისაუბრა უბლოკო სტატუსზე, მკაცრად გააკრიტიკა ჩვენი ქვეყნის ამჟამინდელი ხელისუფლების საგარეო პოლიტიკა:
“განსაკუთრებით მინდა ყურადღება გავამახვილო ქვეყნის უბლოკო სტატუსზე, რაზეც ჩვენი ინიციატივით პარლამენტში შესულია პროექტი დასარეგიტრირებლად. პარლამენტის სათანადო კომიტეტის სხდომა შეგნებულად თუ შეუგნებლად უკვე მეორედ ჩაიშალა. ვფიქრობთ, რომ შეგნებულად არიდებენ თავს ამ საკითხის განხილვას. ლაპარაკია, იმაზე, რომ უნდა გამოცხადდეს უბლოკო სტატუსი, აღვადგინოთ სუვერენიტეტი, საქართველო არ იქნება არც ერთი უცხო ქვეყნის ინტერესების გამტარებელი. ჩვენი ქვეყანა უნდა გამოვიყვანოთ იმ სიტუაციიდან, რასაც ჰქვია მსოფლიოს წამყვანი ქვეყნების დაპირისპირების პოლიგონი. ჩვენი საგარეო პოლიტიკა ვერავითარ კრიტიკას ვერ უძლებს ვერც დასავლეთის, ვერც ნატოს, ვერც ევროკავშირის მიმართულებით, საიდანაც უკვე რამდენი ხანია გვარწმუნებენ, რომ კარები იღება, კარებზე ვაკაკუნებთ, მაგრამ გამღები არავინ ჩანს.
ერთი მიმართულებით ვერ შევდივართ, სამაგიეროდ, მეორე მიმართულებით ვიშოვეთ მტერი. მხედველობაში მაქვს რუსეთის მიმართულება. ამ დაბნეულმა პოლიტიკურმა აზროვნებამ და პოლიტიკურმა საქმიანობამ მიგვიყვანა იქამდე, რომ ქვეყანა დანგრევის პირასაა, გახლეჩილია საზოგადოება და, საერთოდ, თუ ასე გაგრძელდა, ძნელი სათქმელია, მოვახერხებთ თუ არა სახელმწიფოებრიობის შენარჩუნებას ისეთ განსაკუთრებით გართულებულ პოლიტიკურ სიტუაციაში, როგორიც ახლა ჩვენს ირგვლივ არის შექმნილი, მხედველობაში მაქვს ჩვენს მეზობელ ქვეყნებს შორის მიმდინარე პროცესები.
რამდენიმე დღის წინათ საზოგადოების გარკვეული ნაწილი სიხარულით შეხვდა ინფორმაციას, რომ საქართველოს მიმართულებით დაიძრა ნატოს რაღაც სამხედრო აღჭურვილობა, ქვეითთა ძალები. პირდაპირ ვაცხადებ, ამაში სასიხარულო არაფერია, პირიქით, ამას შეიძლება გამოუსწორებელი შედეგები მოყვეს, ისეთიც კი ჩვენს სახელმწიფოებრივ არსებობას, რომ შეეხება”.